سرینگر: جموں و کشمیر نیشنل کانفرنس رکن پارلیمان برائے جنوبی کشمیر جسٹس (ر)حسنین مسعودی نے حکومت سے کہا کہ وہ ان طلبہ کی راحت کے لئے آئے جو وزیر اعظم کی خصوصی اسکالرشپ اسکیم (PMSSS) سے مستفید ہوئے تھے لیکن نادانستہ طور پر نیشنل اسکالرشپ پورٹل (NSP) کے لئے درخواست دی تھی۔
آل انڈیا کونسل فار ٹیکنیکل ایجوکیشن (اے آئی سی ٹی ای) کی جانب سے وزیر اعظم کی خصوصی اسکالرشپ اسکیموں (پی ایم ایس ایس ایس) کے تحت زیر تعلیم کشمیر کے طلبہ کے داخلوں کو کالعدم قرار دینے کے معاملے کو اجاگر کرتے ہوئے مسعودی نے کہا کہ صرف اس وجہ سے کہ انہوں نے نادانستہ طور پر نیشنل اسکالرشپ پورٹل (این ایس پی) پر اسکالرشپ کے لئے درخواست دی تھی، داخلوں کو کالعدم قرار دینا انتہائی ناانصافی ہے۔
انہوں نے کہا کہ مذکورہ طلاب این ایس پی سے حاصل شدہ کسی بھی فائدہ کو واپس کرنے کے لئے تیار ہیں لیکن ان کے داخلوں کو کالعدم قرار نہیں دیا جا سکتا۔ان کا کہنا تھا کہ میں نے یہ مسئلہ وزیر اعظم کے علم میں لایا تھا اور پارلیمنٹ میں بھی اجاگر کیا تھا لیکن افسوس کی بات یہ ہے کہ متعلقہ وزارت صرف جموں اور لداخ کے طلبہ کو بچانے کے لئے آگے آئی اور کشمیر صوبہ کے تقریباً 200 طلاب کو چھوڑ دیا۔
مزید پڑھیں: PM Scholarship Scheme اسکالرشپ کے لیے از خود آن لائن رجسٹر کرنے کی تلقین
مرکزی وزارت تعلیم پر زور دیتے ہوئے کہا کہ وہ اس مسئلے کا نوٹس لے اور کشمیر کے مذکورہ طلبہ کو بچانے کے لئے آگے آئے جیسا کہ جموں اور لداخ کے طلاب کے معاملے میں کیا گیا ۔
(یو این آئی)
