وادی کشمیر میں کووڈ مریضوں کے علاج کی خاطر بہتر سہولیات مہیا رکھنے کے لیے نیشنل کانفرس کے صدر اور رکن پارلیمان ڈاکٹر فاروق عبداللہ نے اپنے ایم پی ایل اے ڈی فنڈ سے سرینگر کے مختلف ہسپتالوں کے لیے ایک کروڑ 40 لاکھ روپے واگزار کیے ہیں۔
ضلع ترقیاتی کمشنر سرینگر محمد اعجاز اسد کو لکھے گئے خط میں ڈاکٹر فاروق عبداللہ نے اپنے حلقہ انتخاب میں قائم مختلف ہسپتالوں میں مریضوں کے لیے بہتر طبی ضروریات کے لئے یہ رقم فراہم کرنے کا اعلان کیا ہے۔
واگزار کی گئی رقم میں ڈائریکٹر ہیلتھ سروسز کے لیے 50 لاکھ رکھے گئے ہیں جبکہ ایس ایم ایچ ایس ہسپتال سرینگر، سی ڈی ہسپتال اور سکمز میڈیکل کالج سرینگر کے لیے بالترتیب 30 لاکھ روپے واگزار کیے گئے ہیں۔
یہ بھی پڑھیں: یوم القدس اور الوداع کے موقع پر خاموش رہی وادی
ڈاکٹر فاروق عبدللہ نے خط میں لکھا ہے کہ وادی کشمیر میں کورونا وائرس کی وبائی بیماری نے بھیانک شکل اختیار کی ہے جس کی وجہ سے متاثرین اور مہلوکین کی تعداد میں ہر گزرتے دن کے ساتھ ہوش ربا اضافہ دیکھنے کو مل رہا ہے۔
ایسی تشویشناک صورتحال کے پیش نظر ایم پی فنڈ سے واگزار کی گئی رقم کو ہسپتالوں میں متاثرہ مریضوں کے علاج اور دستیاب سہولیات کے لیے کام میں لانا وقت کی اہم ضرورت ہے۔
