محکمہ داخلہ کے ایک حکمنامے کے مطابق جنوبی کشمیر کے پلوامہ ضلع کے پانپور قصبے میں ایس ڈی پی او سطح کا پولیس ڈویژن قائم کیا گیا ہے، اس سے قبل وہاں ایس ایچ او لیول کا پولیس اسٹیشن قائم تھا۔
وہیں کولگام ضلع کے قاضی گنڈ میں سرینگر - جموں شاہراہ پر ایڈیشنل (ہائی ویز) کا دفتر قائم کرکے شاہراہ کی سیکورٹی کو مزید مستحکم کیا جائے گا۔
حکمنامے کے مطابق جنوبی کشمیر کے اننت ناگ ضلع کے ہلر، ڈکسم، ہتی پور، نئلو، اور ٹال پلازہ چُرسو کے مقامات پر نئی پولیس چوکیاں قائم کی گئی ہیں۔
کولگام ضلع کے بہی باگ میں پولیس چوکی کو پولیس اسٹیشن کا درجہ دے کر اس کا احاطہ وسیع کرکے 18 گاؤں اس میں شامل کئے گئے ہیں۔
یاد رہے کہ رواں سال جنوری میں سرینگر ائیرپورٹ کی حفاظت کو سنٹرل انڈسٹرئیل سیکورٹی فورسز کے حوالے کیا گیا تھا کیونکہ جموں و کشمیر پولیس میں تعینات ڈی ایس پی دیوندر سنگھ کو عسکریت پسندوں کے ساتھ قاضی گنڈ شاہراہ پر گرفتار کیا گیا تھا۔
قابل ذکر ہے کہ جنوبی کشمیر میں سنہ 2016 سے عسکری سرگرمیوں میں اضافہ دیکھا جا رہا ہے جبکہ اس علاقے کے چار اضلاع پلوامہ، کولگام، شوپیاں اور اننت ناگ میں سیکورٹی کی تعداد بڑھا دی گئی تھی۔
شوپیاں ضلع میں سنہ 2018 میں عسکریت پسندوں کی سرگرمیوں میں اضافے کے بعد وہاں قریبا آٹھ نئے فوجی کیمپ قائم کئے گئے تھے۔
رواں سال کے چھ ماہ میں جنوبی کشمیر میں عسکریت مخالف کارروائیوں میں زبردست اضافہ دیکھا گیا ہے۔
واضح رہےکہ رواں سال میں اب تک 110 عسکریت پسند مختلف چھڑپوں میں ہلاک کئے گئے ہیں جن میں بیشتر جھڑپیں جنوبی کشمیر کے اضلاع میں ہوئیں۔
