قیدیوں کو رہا کیا جائے، محبوبہ مفتی کا مودی سے مطالبہ

محبوبہ مفتی کا کہنا ہے کہ کورونا وائرس کی تباہی سے ملک دو چار ہے اور اس صورتحال میں جیلوں میں قیدی سرکار کی آخری ترجیح ہوں گے۔

پی ڈی پی صدر اور سابق وزیر اعلٰی محبوبہ مفتی نے وزیر اعظم نریندر مودی کو ملک کے مختلف جیلوں میں قید کشمیری سیاسی رہنماؤں کو رہا کرنے کا مطالبہ کیا ہے۔

محبوبہ مفتی نے مودی کو ایک مکتوب لکھا ہے جس کی ایک کاپی پی ڈی پی نے ٹویٹر پر شائع کی ہے۔

محبوبہ مفتی

محبوبہ مفتی کا کہنا ہے کہ کورونا وائرس کی تباہی سے ملک دو چار ہے اور اس صورتحال میں جیلوں میں قیدی سرکار کی آخری ترجیح ہوں گے۔

ان کا کہنا تھا کہ پانچ اگست 2019 کے بعد ہزاروں کشمیری اور سیاسی قیدی ملک کے مختلف جیلوں میں بند ہیں اور کووڈ کی صورتحال سے انہیں تشویشناک حالات درپیش ہیں۔

ان کا کہنا ہے کہ بیشتر زیر حراست قیدیوں کے خلاف کوئی مقدمہ نہیں چلایا جا رہا ہے اور بہت سے قیدیوں کو ضمانت کے بعد بھی جیل میں رکھا گیا ہے۔

انہوں کہا کہ حالیہ دنوں اشرف صحرائی کی موت ایک مثال ہے کہ ان کو کورونا وائرس میں مثبت پائے جانے کے بعد علاج سے محروم رکھا گیا۔

انہوں نے مزید لکھا ہے کہ ایک جمہوری اور مہذب ملک ہونے کے سبب حکومت کو ان قیدیوں کو فوراً رہا کرنا چاہئے تاکہ وہ اپنے گھروں میں اس وقت محفوظ رہیں جب زندگی خطروں سے دوچار ہے۔

محبوبہ مفتی نے امید ظاہر کرتے ہوئے وزیر اعظم سے التجا کی کہ ان قیدیوں کی رہائی عمل میں لائی جائے۔