سرینگر: کشمیر پاور ڈسٹری بیوشن کمپنی لمیٹڈ (کے پی ڈی سی ایل) نے وادیٔ کشمیر میں وقفہ وقفہ سے بجلی تخفیف کے شیڈول کو بڑھانے کا اعلان کیا ہے۔ ایسے میں اب شیڈول کے مطابق تخفیف کا دورانیہ 2 سے ڈھائی گھنٹے کر دیا گیا ہے۔ وادیٔ کشمیر میں موجودہ موسمی صورت حال اور طویل خوشک سالی کے پیش نظر کشمیر پاور ڈسٹری بیوشن کمپنی لمیٹڈ نے عوام کو مطلع کیا ہے کہ بجلی کی پیداوار میں زبردست کمی کے نتیجہ میں یہ فیصلہ لیا جارہا ہے۔ اس طرح اب محکمہ کو وقفہ وقفہ سے اس عارضی دورانیہ میں دو سے ڈھائی گھنٹے کا اضافہ کرنا پڑے گا۔
یہ بھی پڑھیں:
بجلی کی غیر اعلانیہ کٹوتی سے اب وادی کے ہسپتال بھی زد میں آ گئے
محکمہ کے مطابق جیسے ہی بجلی کی پیدوار میں معقولیت آئی گی اور اضافہ ہوگا تو یہ عارضی دورانیہ کو واپس لے لیا جائے گا۔ متعلقہ محکمہ نے دورانیہ بڑھانے کی وجہ سے صارفین کو ہونے والی تکلیف پر معذرت کا اظہار کیا ہے۔ واضح رہے کہ وادیٔ کشمیر میں میٹر والے علاقوں میں وقفہ وقفہ سے بجلی تخفیف شیڈول دو گھنٹے کا ہوا کرتا تھا۔ جب کہ غیر میٹر والے علاقوں میں اس تخفیف کا دورانیہ اس سے بھی زیادہ تھا۔
پانی کی قلت کی وجہ سے جموں و کشمیر سے بجلی پیدا کرنے کی صلاحیت تقریباً 85 فیصد کم ہو گئی ہے۔ پورے خطے سے بجلی کی پیداواری صلاحیت 1200 میگاواٹ ہے۔ پی ڈی ڈی کے پرنسپل سکریٹری نے پہلے کہا تھا کہ یونین ٹیریٹری پول سے بجلی کی پیداوار میں بہت زیادہ کمی ہے۔ ریاستی پول سے ہمارے پاس 1200 میگاواٹ بجلی پیدا کرنے کی صلاحیت ہے۔ تاہم دسمبر 2023 میں پانی کی کمی کی وجہ سے صرف 150 میگاواٹ بجلی پیدا ہو رہی ہے۔
