انتظامیہ نے واضح کیا ہے کہ عالمی وبا کورونا وائرس کے خطرات کے پیش نظر کشمیر میں اسکول بند نہیں کئے جائیں گے بلکہ صرف ایسے تعلیمی اداروں میں چند روز کے لئے درس و تدریس کا عمل معطل کیا جائے گا جہاں کسی طالب علم یا عملہ کو کورونا وائرس میں مبتلا پایا جائے گا۔
ناظم تعلیم محمد یونس ملک نے کہا کہ وادی کشمیر کے مختلف علاقوں میں قائم 2ہزار ہائی اسکولوں میں سے 4 اسکولوں میں کورونا کے مثبت معاملات پائے گئے ہیں۔ انہوں نے کہا کہ بعد میں جب مڈل سطح کے اسکول کھلے تو پھر 2 سے 3 اسکولوں میں کورونا معاملات سامنے آئے۔
ناظم تعلیم نے مزید کہا کہ محکمہ اسکول ایجوکیشن کے تمام حکام کو ہدایت جاری کی گئی ہے کہ اسکولوں میں مشتبہ عملے اور طلبہ کی کورونا جانچ کی جائے تاکہ اسکولوں میں وائرس سے متاثرہ طلبہ کا پتہ لگایا جا سکے۔ تاہم انہوں نے واضح کیا کہ ’’بعض اسکولوں کے کیسز کی وجہ سے سبھی اسکولوں کو یرغمال نہیں بنائیں گے۔ البتہ کورونا وائرس کے تمام احتیاطی تدابیر پر عمل درآمد کرتے ہوئے اسکولوں میں مکمل طور پروگرام بنا کر تعلیمی اور تدریسی سرگرمیاں شروع کی گئی ہیں۔‘‘
محمد یونس نے مزید کہا کہ محکمہ تعلیم نے اسکولوں میں سینیٹائزر اور ماسک دستیاب رکھنے کے لئے اضافی وسائل کو بھی متحرک کیا ہے تاکہ کورونا وائرس کے پھیلاو کو روکنے کے لیے وضع کئے گئے رہنما خطوط پر بہتر طریقے سے عمل درآمد کیا جاسکے۔
