کشمیر فائٹ بلاگ معاملے میں سرینگر کی ایک خصوصی عدالت نے جمعرات کو ایک اور ملزم کی درخواست ضمانت منظور کر دی۔
سرینگر کی ٹاڈا کورٹ میں معاملے پر ہوئی سماعت کے دوران جسٹس منجیت سنگھ منہاس نے ملزم صوفی اکبر کو بانڈ جمع کرنے کی شرط پر ضمانت دینے کا فیصلہ کیا۔
صوفی کے وکیل مشتاق احمد ڈار نے ضمانت کی تصدیق کرتے ہوئے کہا کہ ’’پلوامہ کے رہنے والے صوفی اکبر کو کشمیر فائٹ بلاگ کیس میں ضمانت دے دی گئی ہے۔‘‘
اس سے قبل رواں مہینے کی 11 تاریخ کو عدالت نے اسی معاملے میں گرفتار دو دیگر ملزمان - نازش رحمانی اور جاوید خالد - کی ضمانت منظور کی تھی۔
مزید پڑھیں: اوڑی درندازی میں تین درنداز ہلاک، ہتھیار ضبط
ڈار کا مزید کہنا تھا کہ اکبر پر یو اے پی اے ایکٹ کے دفعہ 13, 16,18, اور 20 کے تحت سرینگر کے كوٹھی باغ میں کیس درج ہے۔
واضح رہے کہ رواں برس جولائی مہینے کی سات تاریخ کو جموں و کشمیر پولیس نے کشمیر فائٹ بلاگ معاملے میں پانچ افراد کو گرفتار کیا تھا۔
