سرینگر: درگاہ حضرت بل سرینگر میں گزشتہ روز ایک بھیانک آتشزدگی میں تین شاپنگ کمپلیکس اور سات رہائشی مکانوں کو نقصان پہنچا ہے۔آگ ریسٹورینٹ سے ظاہر ہوئی جس نے آناً فاناً تین شاپنگ کمپلیکس اور ایک بستی کو لپیٹ میں لے لیا۔فائر اینڈ ایمرجنسی کے مطابق شاپنگ کمپلیکس میں موجود 10سے 20گیس سلنڈر زور دار دھماکوں کے ساتھ پھٹ گئے جس وجہ سے آگ نے بھیانک رخ اختیار کیا۔اس آتشزدگی کے بعد جموں و کشمیر وقف بورڈ نے اس معاملے کی تحقیقات کے لیے چار رکنی ٹیم تشکیل دی ہے ۔ٹیم کو 10 روز کے اندر انکوائری رپورٹ پیش کرنے کی ہدایت دی گئی۔
وقف بورڈ کی جانب سے جاری کردہ سرکلر کے مطابق، ماضی میں حضرت بل سرینگر میں وقف املاک کی غیر قانونی منتقلی کے سنگین الزامات اور وقف ملازمین اور کرایہ داروں کی مبینہ لاپرواہی کے پیش نظر آتشزدگی کے واقعہ کی تحقیقات کے لیے ایک کمیٹی تشکیل دی گئی ہے۔ چار رکنی کمیٹی میں ڈاکٹر غلام نبی حلیم چیئرمین ہوں گے جبکہ مدینۃ العلوم کے پرنسپل معراج الدین بیگ، محمد عاشق وانی اور جے ای الیکٹریکل جاوید اقبال وانی ممبر ہوں گے۔
حکم نامے میں مزید کہا گیا ہے کمیٹی جائیداد کی الاٹمنٹ کی تاریخ اور فوری طور پر جائیداد کی غیر مجاز منتقلی کے الزامات کا بھی جائزہ لے گی اور 10 دن کے اندر اپنی رپورٹ سفارشات کے ساتھ پیش کرے۔
مزید پڑھیں: Fire Incident at Dargah حضرت بل سرینگر میں بھیانک آتشزدگی، تین شاپنگ کمپلیکس، سات رہائشی مکان خاکستر
واضح رہے کہ ملک بھر میں ہر برس 14 اپریل سے 20 اپریل تک فائر اینڈ ایمرجنسی سروس ہفتہ منایا جاتا ہے۔ اس ہفتے کو منانے کا مقصد عوام کو آتشزدگی سے بچاؤ اور احتیاطی تدابیر کے بارے میں آگاہ کرنا ہے۔ اس ہفتے ان بہادر فائرمینز کو بھی یاد کیا جاتا ہے جنہوں نے بچاؤ کارروائیوں کے دوران عوامی جانی اور مالی کے تحفظ فراہم کرنے کے لیے اپنی جانوں کا نظرانہ پیش کیا ہے۔
