بدھ کے روز جموں و کشمیر انتظامیہ کی طرف سے تشکیل کردہ ایک کمیٹی نے دارالحکومت جموں و سرینگر میں سبز پٹاخے (ماحول دوست پٹاخے) کے استعمال کی سفارش کی ہے، تاہم خلاف ورزی کرنے والوں کے خلاف سخت کاروائی کرنے کی بھی ہدایت دی گئی ہے۔
ذرائع نے بتایا کہ ریاستی ایگزیکیوٹیو کمیٹی نے جموں اور سرینگر میں پٹاخوں کی فروخت اور استعمال کے لیے ہدایات جاری کی ہیں اور صرف سبز پٹاخے کے استعمال کی سفارش کی ہے۔
انتظامیہ نے بتایا کہ جموں اور سرینگر کے شہروں میں صرف سبز پٹاخوں کو فروخت کرنے اور استعمال کرنے کی اجازت ہوگی۔ تہواروں کے دوران سبز پٹاخوں کو پھوڑنے اور ان کے استعمال صرف دو گھنٹے تک ہی محدود رہے گا۔
جموں میں سات مقامات پر ای ڈی کے چھاپے
کمیٹی نے پٹاخے پھوڑنے کے لیے وقت بھی مقرر کیا ہے جس کے مطابق دیوالی اور گرو پرب کے موقع پر رات 8 بجے سے 10 بجے تک پٹاخے پھوڑ سکتے ہیں۔ کرسمس کے موقع پر رات 11 بجکر 55 منٹ سے ساڑھے بارہ بجے تک پٹاخوں کا استعمال کیا جا سکتا ہے۔ چھٹھ کے تہوار کے موقع پر صبح 6 بجے سے 8 تک پٹاخے پھوڑے جا سکتے ہیں۔
کیمٹی نے ضلع ترقیاتی کمشنر سے کہا ہے کہ وہ اس سلسلے میں وسیع پیمانے پر عوامی آگاہی مہم چلائیں۔
کمیٹی نے کہا ہے کہ مذکورہ ہدایات کی کسی بھی قسم کی خلاف ورزی کرنے والوں کے خلاف ڈیزاسٹر مینجمنٹ ایکٹ کے سیکشن 51 سے 61 کے تحت فوری طور پر کارروائی کی جائے گی۔
