کشمیر: برفباری سے علاقوں کی بیشتر سڑکیں بند، عوام پریشان

کشمیرمیں موسم سرما کے سبب ہورہی برفباری سے علاقوں کی بیشتر سڑکیں بند پڑی ہیں, جس کے نتیجے میں ٹرانسپورٹ کی سہولیات سے لوگ محروم ہوچکے ہیں۔اس دوران دیہی علاقوں کی سڑکیں بھی بند ہیں، مریضوں کو ہسپتال لے جانا کافی دشوار ہوگیا ہے۔

جموں و کشمیر کے مختلف اضلاع میں شدید برفباری کے سبب بیشتر سڑکیں بند ہیں جبکہ اکثر علاقوں میں بجلی سپلائی بھی منقطع ہے۔ میدانی علاقوں میں تقریباً 8 سے 15 انچ جبکہ پہاڑی علاقوں میں 2 سے 4 فٹ اونچی برف جمی ہوئی ہے۔

برفباری کی وجہ سے سڑکیں برف سے ڈھک گئی ہیں علاقے کے لوگ اپنے گھروں میں قید ہیں۔ قاضی گنڈ کی شودہ گلی میں بجلی کی تاریں سڑک پر گری پڑی ہیں جس کی وجہ سے علاقے میں پورے طور پر بجلی میں سپلائی بند ہے۔

لوگوں نے بتایا کہ انتظامیہ سڑکوں سے برف ہٹانے کے لئے کوئی کوشش نہیں کر رہی ہے۔ مقامی لوگوں نے کہا کہ' اگرچہ اہم شاہراہوں سے برف ہٹائی گئی ہے، تاہم اکثر سڑکوں پر قریب 2 فٹ اونچی برف اب بھی جمع ہے جس کے نتیجے میں لوگ اپنے گھروں سے باہر نہیں نکل پارہے ہیں۔