'کشمیرمیں اضافی کمپنیوں کی تعیناتی معمول کی بات'

سی آر پی ایف کے انسپکٹر جنرل روی دیپ سنگھ سائی نے کشمیر میں اضافی فورسز کمپنیوں کی تعیناتی کے حوالے سے کہا کہ 'یہ کوئی خاص مسئلہ نہیں ہے بلکہ معمول کی بات ہے'۔

جنرل روی دیپ سنگھ سائی نے نامہ نگاروں سے بات کرتے ہوئے کہا: 'اضافی کمپنیوں کی تعیناتی معمول کا مسئلہ ہے یہ کوئی خاص بات نہیں ہے جب بھی امن وقانون قائم کرنے کی ضرورت محسوس کی جاتی ہے تو ایسا کیا جاتا ہے، ماضی میں اضافی فورسز کی تعیناتی عمل میں لائی گئی'۔

آئی جی نے عسکریت پسندی کے بارے میں پوچھے گئے ایک سوال کے جواب میں کہا: 'مجموعی طور پر صورتحال قابو میں ہے، عسکریت پسندانہ سرگرمیاں روبہ زوال ہیں اور سنگ باری کے واقعات میں بھی کمی واقع ہوئی ہے جو فورسز کی مختلف ایجنسیز کے درمیان تال میل کا نتیجہ ہے'۔ انہوں نے کہا کہ انٹلی جنس کی بنیادوں پر ہی آپریشنز انجام دیے جاتے ہیں۔واضح رہے کہ مرکزی وزارت داخلہ کی طرف سے ریاستی حکومت کو بھیجے گئے ایک مکتوب میں کہا گیا ہے کہ ریاست میں سی آر پی ایف کی 50، بی ایس ایف کی 10 کمپنیاں، ایس ایس بی کی 30 کمپنیاں اور آئی ٹی بی پی کی 10 اضافی کمپنیاں تعینات کی جائیں گی۔ مکتوب میں کہا گیا ہے کہ اضافی فورسز کی تعیناتی کا فیصلہ لاء اینڈ آڈر کو یقینی بنانے کے لئے لیا گیا ہے۔