نوجوانوں کی صلاحیتوں کو نکھارنے کی ضرورت

لیفٹیننٹ گورنر منوج سنہا نے کہا کہ جموں و کشمیر کے نوجوان باصلاحیت ہیں تاہم ان کی صلاحیتوں کو نکھارنا ضروری ہے

منوج سنہا نے بتایا کہ 'بہتر کل کے لیے نوجوانوں کی با اختیاری لازمی ہے جب ہم نوجونوں کو با اختیار بناتے ہیں تو ہم قوم کو با اختیار بناتے ہیں۔ نوجوانوں کو با اختیار بنا کر معاشی و معاشرتی تبدیلی لانا وقت کا اہم تقاضا ہے جس کے لئے تمام متعلقین کی اجتماعی کوششیں لازمی ہے۔

لیفٹیننٹ گورنر منوج سنہا نے پیر کے روز نوجوانوں کو با اختیار بنانے کے پروگرام کی بہتر عمل آوری کے لئے طریقہ کار پر غور و خوض کرنے کے لیے منعقدہ میٹنگ کی صدارت کرتے ہوئے کہا کہ جموں و کشمیر کے نوجوانوں میں صلاحیتوں میں کوئی کمی نہیں تاہم ان صلاحیتوں کو نکھارنے کی ضرورت ہے۔

لیفٹیننٹ گورنر نے کہا کہ یو ٹی کے نوجوان کافی باصلاحیت ہیں اور مجوزہ پروگرام اُن کو معاونت فراہم کرنے کے لئے ایک ادارہ جاتی نظام ثابت ہوگا۔

انہوں نے متعلقہ افسران کو نوجوانوں کی با اختیاری کے لئے بہترین عالمی طریقہ کار اختیار کرنے کے لئے کہا اور اس کے ساتھ ہی بزنس سکولوں کو سٹیڈیز میں شامل کرنے کے لئے کہا۔

منوج سنہا نے کہا کہ ہمیں خطے میں نوجوانوں میں اعتماد اور اثبات کا ماحول قائم کرنا ہوگا اور نوجوانوں کے مسائل اور ضروریات کی جانب توجہ دینی ہوگی۔