سرینگر گورنمنٹ میڈیکل کالج کے پرنسپل ڈاکٹر سامعیہ رشید نے ای ٹی وی بھارت کو بتایا کہ کووڈ 19 مریضوں کے لیے ایس ایم ایچ ایس ہسپتال میں چار مزید وارڈز کو مختص کیا گیا ہے۔
انکا کہنا تھا کہ ان چار وارڈز میں 100 سے زائد مریضوں کے لیے بیڈ رکھے گئے ہیں۔ قابل ذکر ہے کہ اس سے قبل انتظامیہ نے وادی میں تین بڑے ہسپتال کووڈ 19 مریضوں کے لیے مخصوص رکھے تھے۔ سی ڈی، جے ایل این ایم، سکمز میڈیکل کالج بمنہ، اور سکمز صورہ میں بھی چند وارڈز مخصوص رکھے گئے تھے۔
لیکن اب کورونا وائرس کیسز کی بڑھتی تعداد کے بیچ مزید وارڈز اس مختص رکھے گئے ہیں۔ ڈاکٹرز کا ماننا ہے کہ کورونا متاثرین کی بڑھتی تعداد کی وجہ سے وادی میں صحت کا نظام بری طرح متاثر ہو گا۔
ادھر انتظامیہ نے لاک ڈاون میں مزید نرمی کرتے ہوئے جموں و کشمیر میں تفریحی باغات کھول دئے ہیں وہیں بازاروں میں بھی لوگوں کی کافی تعداد دکھائی دے رہے ہے جہاں احتیاطی تدابیر پر عمل نہیں کی جارہی ہے۔ طبی ماہرین کا کہنا ہے کہ اس صورتحال میں کورونا وائرس کے پھیلاؤ کا خطرہ مزید بڑھ رہا ہے۔
غور طلب ہے کہ جموں و کشمیر میں اب تک 153 افراد کورونا وائرس سے فوت ہو چُکے ہیں جن میں 137 کا تعلق وادی کشمیر سے ہے جبکہ 14 اموات جموں صوبے سے ہیں۔۔
جموں و کشمیر میں کورونا وائرس سے متاثر افراد کی تعدا 9261 پہنچی ہے جن میں 3545 ایکٹو پازیٹو ہیں جبکہ باقی صحتیاب ہو چکے ہیں۔
انتظامیہ کا کہنا ہے کہ تاحال 4 لاکھ سے زائد نمونوں کے جانچ کی گئی ہے۔
