سرینگر: سابق نائب میئر کے خلاف بدعنوانی کا معاملہ سی بی آئی کے سپرد

'اے سی بی کی گزارش پر سرینگر کے سابق نائب میئر شیخ عمران کے بدعنوانی معاملے کو سی بی آئی کو سونپ دیا گیا ہے۔ مرکزی ایجنسی کو اس معاملے کی دوبارہ تحقیقات کرنے کو کہا گیا ہے۔'

جموں و کشمیر انتظامیہ نے سرینگر میونسپل کارپوریشن کے سابق نائب میئر اور یوتھ پیپلز کانفرنس کے صدر شیخ عمران کے خلاف درج بدعنوانی معاملے کو سینٹرل بیورو آف انویسٹیگیشن (سی بی آئی) کے سپرد کر دیا۔

انتظامیہ کے ایک سینئر افسر نے ای ٹی وی بھارت کو فون پر بتایا کہ 'اینٹی کرپشن بیورو (اے سی بی) کی گزارش پر شیخ عمران کے بدعنوانی معاملے کو سی بی آئی کے سپرد کر دیا گیا ہے۔ مرکزی ایجنسی کو اس معاملے کی دوبارہ تحقیقات کرنے کو کہا گیا ہے۔‘‘

انہوں نے مزید کہا کہ سی بی آئی نے دوبارہ تحقیقات کرنے کے لیے اس معاملے میں جموں و کشمیر پی سی ایکٹ سمیت 2006 کے دفعہ 5(1) (d), 5(2) اور پینل کوڈ کے دفعہ 120 (b) اور 420 کے تحت سرینگر میں معاملہ درج کر لیا ہے۔

واضح رہے کہ شیخ عمران کو اے سی بی نے سنہ 2019 کے دسمبر مہینے میں گرفتار کیا تھا۔