معیشت کی بحالی کے لئے کمیٹی کی تشکیل، تاجر پراُمید

لیفٹیننٹ گورنر کا کہنا ہے کہ یہ کمیٹی جموں و کشمیر میں اقتصادی حالات کو بحال کرنے اور تجارت کو ضروری خدمات فراہم کرنے کے لئے تجویز پیش کرے گی-

جموں و کشمیر کے لیفٹیننٹ گورنر منوج سنہا نے اقتصادی حالت کو بحال کرنے کے لئے ایک اعلیٰ سطحی کمیٹی تشکیل دی ہے جس میں کہا گیا ہے کہ تجارتی سرگرمیوں کو بہتر بنانے کے لیے یو ٹی میں موزوں ماحول اور اقدامات انتظامیہ کے زیر غور ہے-

سنہا نے پیر کو وادی کی تاجر انجمن کشمیر چیمبر آف کامرس اینڈ انڈسٹریز کے وفد سے گزشتہ ایک برس سے پیدا شدہ اقتصادی صورتحال پر گفتگو کی-

سنہا کی ہدایت پر اس اعلیٰ سطحی کمیٹی میں گورنر کے مشیر کے کے شرما، فائنانشل کمشنر ارون کمار مہتا، کمشنر سیکریٹری منوج کمار دیویدی، محکمہ سیاحت کے سیکریٹری زبیر احمد اور جموں و کشمیر بینک کے چیئرمین شامل ہیں- یہ کمیٹی یکم ستمبر کو رپورٹ پیش کرے گی-

لیفٹیننٹ گورنر کا کہنا ہے کہ یہ کمیٹی جموں و کشمیر میں اقتصادی حالات کو بحال کرنے اور تجارتی سرگرمیوں کو بہتر کرنے کے لیے ضروری تجاویز پیش کرے گی-

گزشتہ برس پانچ اگست اور لیفٹیننٹ گورنر منوج سنہا اپنا عہدہ سنبھالنے کے بعد یہ جموں و کشمیر انتظامیہ کا پہلا بڑا قدم ہے کہ وادی میں لوگوں سے ملاقات اور انکے مسائل کو جاننے کیلئے ضروری اقدامات کی شروعات کی گئی ہے-

اس ضمن میں کشمیر چیمبر آف کامرس اینڈ انڈسٹریز کے نائب صدر ناصر حمید خان نے ای ٹی وی بھارت کو بتایا کہ یہ انتظامیہ کا خوش آئند قدم ہے اور تاجروں کو توقع ہے کہ تجارت و اقتصادیات کی بحالی کیلئے انتظامیہ ٹھوس اقدامات اٹھائے گی-