بسئمہ ایوب پیشے سے میڈیکل کی طالبہ ہیں اور انہوں نے 'دی کریٹیو مائنڈ' کے نام سے ایک کتاب لکھی ہے جس میں بسئمہ نے جموں و کشمیر سے تعلق رکھنے والے 28 مصنفوں کا تذکرہ کیا ہے اور ان کے کام کو اجاگر کرنے کی کوشش کی ہے۔
بسئمہ ایوب سماجی کاموں میں کافی دلچسپی رکھتی ہیں اور وہ کہتی ہیں کہ وہ سماج کے لیے کچھ الگ اور خاص کرنا چاہتی ہیں۔
ای ٹی وی بھارت سے بات کرتے ہوئے بسئمہ ایوب نے کہا کتاب لکھنے کا اصل مقصد جموں و کشمیر کے باصلاحیت نوجوان مصنفوں کی تشہیر اور ان کو بااختیار بنانا ہے۔ کیونکہ ان مصنفوں کو ان کے کام کے لیے آج تک کسی بھی سطح پر حوصلہ افزائی نہیں ملی ہے۔ اس کتاب کی وجہ سے ان کے شاندار سفر کی شروعات ہوگی۔
انہوں نے مزید کہا 'آج کل ہمارے سماج میں ایک الگ سوچ بن گئی ہے کہ اصل مصنف وہی ہے جسے زبردست واہ واہی ملے یا ہر طرف اس کی پزیرائی ہو۔ لیکن میں اس قدامت پسند سوچ کو توڑنا چاہتی ہوں'۔ بسئمہ ایوب کشمیر کے معروف شاعر رسول میر کی شاعری پر بھی کتاب لکھ رہی ہیں'۔
