جموں و کشمیر یتیم فاؤنڈیشن نامی ایک مقامی غیر سرکاری تنظیم (این جی او) نے پہاڑی ضلع شوپیاں کے نسرپورہ، کیلر علاقے میں قائم ایک طبی مرکز میں مفت میڈیکل کیمپ کا انعقاد کیا۔
طبی کیمپ میں دور دراز علاقوں سے آئے درجنوں افراد کا طبی معائنہ کیا گیا وہیں انہیں ادویات بھی مفت فراہم کی گئیں۔
طبی جانچ کے دوران شیر کشمیر میڈیکل انسٹی ٹیوٹ صورہ، ضلع اسپتال شوپیاں سمیت سب ڈسٹرکٹ اسپتال کیلر سے تعلق رکھنے والے کئی ڈاکٹر صاحبان موجود تھے۔
طبی کیمپ کا انعقاد کرنے والی این جی او کے ممبران نے کہا کہ ’’کووڈ 19 اور زیادہ برفباری کے باعث دور دراز اور دیہی علاقوں سے تعلق رکھنے والے مریض سرینگر یا دیگر علاقوں میں جاکر علاج ومعالجہ نہیں کرا پاتے، اس طرح کے کیمپ سے ان دور دراز دیہات میں رہائش پذیر عوام کو کافی راحت پہنچتی ہے۔‘‘
مقامی باشندوں نے این جی او کی کاوشوں کی سراہنا کرتے ہوئے مستقبل میں اس طرح کے مزید طبی کیمپ منعقد کیے جانے کی امید ظاہر کی۔
دریں اثناء، جموں و کشمیر یتیم فاؤنڈیشن کے عہدیداروں نے بتایا کہ انکا ادارہ جموں و کشمیر میں سینکڑوں یتیموں، بیوائوں اور حاجتمندوں کی مدد کے علاوہ دور دراز علاقوں میں طبی کیمپس کا انعقاد کرنے کے علاوہ راشن کٹس اور گرم ملبواست بھی فراہم کرتا ہے۔
انہوں نے مزید کہا کہ مریضوں کی طبی جانچ کے علاوہ انہیں کورونا کے پھیلاؤ کو روکنے کے لیے وضع کیے گئے رہنما خطوط سے متعلق بھی آگاہی فراہم کی گئی۔
