جنوبی کشمیر کے شوپیاں ضلع کے کنیگام علاقے میں گزشتہ روز سے جاری انکاؤنٹر میں دو عسکریت پسند ہلاک ہوئے ہیں جبکہ دو فوجی اہلکار بھی زخمی ہوئے ہیں۔
گزشتہ روز فورسز اور عسکریت پسندوں کے بیچ فائرنگ کے تبادلے کے بعد فوجی اہلکاروں نے پورے علاقے کو گھیرے میں لے کر تلاشی آپریشن شروع کردیا تھا جسے اندھیرا ہونے کے باعث آج صبح تک ملتوی کر دیا گیا تھا۔
تازہ ترین اطلاعات کے مطابق تصادم میں دو عسکریت پسند ہلاک ہوئے ہیں جبکہ دو فوجی اہلکار بھی زخمی ہوئے ہیں۔
دسمبر 25 کی سہ پہر چار بجکر 15 منٹ پر فورسز کو علاقے میں دوعسکریت پسندوں کی موجودگی کی خفیہ اطلاع ملی جس کے بعد کنیگام شوپیاں کو سکیورٹی فورسز نے حصار میں لیا۔ جوں ہی فورسز کے اہلکار مخصوص مقام کی جانب پیش قدمی کرنے لگے، وہاں چھپے عسکریت پسندوں نے ان پر فائرنگ شروع کردی، جس کے نتیجہ میں دو عسکریت پسند ہلاک کئے گئے۔
ذرائع نے ہلاک شدہ عسکریت پسندوں کی شناخت آصف لون ساکنہ ترک وانگام اور اویس فاروق ساکنہ چرسو اونتی پورہ کے طور کی ہے۔
اس کارروائی میں فوج کی 44 آر آر، 178 سی آر پی ایف اور جموں و کشمیر شامل ہے۔
ادھر ضلع میں موبائل انٹرنیٹ خدمات کو معطل کردیا گیا ہے۔
