جموں و کشمیر، ضلع شوپیان کے پدپاون علاقے کے لوگوں نے انتظامیہ کے خلاف ناراضگی کا اظہار کرتے ہوئے کہا کہ گزشتہ کئی برسوں سے نالہ رمبہ آرہ سے ریت اور باجری نکالنے کا سلسلہ جاری ہے جس کی وجہ سے مقامی آبادی کو جان ومال کا خطرہ لاحق ہیں۔
مقامی لوگوں کے مطابق دوران شب ریت مافیا نالہ رمبہ آرہ میں مشینری لگا کر ریت اور باجری نکال رہے ہیں جس کی وجہ سے نالہ رمبہ آرہ نے خطرناک شکل اختیار کرلی ہے۔
مقامی شخص نے بتایا کہ ٹریکٹر، ٹپرز اور بلڈوزر لگا کر اس نالہ کو کھنڈرات میں تبدیل کیا گیا ہے اور یہ ریت مافیا مقامی آبادی میں مشنری لگا کر ریت نکالتے ہیں جس کی وجہ سے لوگوں کے گھروں کو کافی نقصان پہنچا ہے اور ساتھ ہی محکمہ جل شکتی کی طرف سے بچھائی گئی پائپیں بھی پھٹ گئی ہے اور باندھ بھی توڑ دیے ہیں۔
لوگوں نے بتایا کہ انہوں نے اس سے پہلے بھی ضلع کے اعلیٰ عہدیداروں تک اس مسئلہ کو پہنچایا تھا، تاہم گزشتہ کئی برسوں سے اس ناجائز کام پر روک نہیں لگائی گئی ہے، مقامی لوگوں نے ریت مافیا کے خلاف قانونی کاروائی کا مطالبہ کیا ہے۔
