ضلع شوپیاں سے تعلق رکھنے والے ایک فوجی اہلکار کو عسکریت پسندوں نے اغوا کر لیا تھا۔ جس کے بعد اسے ڈھونڈنے کی ہر ممکن کوشش کی گئی تاہم اس کا کوئی پتہ نہ چل سکا۔
منگل کو جنوبی کشمیر کے کولگام ضلع کے مہن پورہ علاقے میں مقامی لوگوں کو ایک لاش برآمد ہوئی۔ مغویہ فوجی اہلکار کے والد منظور احمد نے تصدیق کرتے ہوئے کہا کہ لاش ان کے فرزند کی ہے، تاہم فورنسک کی ٹیم نے نمونے ڈی این اے ٹیسٹ کے لیے روانہ کر دیے ہیں۔
واضح رہے کہ 2 اگست 2020 اتوار کی شام دیر گئے عسکریت پسندوں نے شوپیان ضلع کے ریشی پورہ حرمین سے تعلق رکھنے والے 162بتالین ٹیریٹوریل آرمی سے وابستہ فوجی اہلکار شاکر منظور کو اس وقت اغوا کر لیا جب وہ اپنے گھر سے ڈیوٹی پر جا رہے تھے۔
مزید پڑھیں: ’علاقوں کے نام تبدیل کرکے لوگوں کے جذبات مجروح کیے جا رہے ہیں‘
شاکر منظور کو عسکریت پسندوں نے گاڑی - زیر رجسٹریشن نمبر JK22B/3960 - سمیت اغوا کرکے کار کو کولگام ضلع کے نیہامہ علاقے میں نذر آتش کر دیا تھا۔ شاکر منظور عید منانے اپنے گھر آئے ہوئے تھے۔
شاکر کے اغوا ہونے کے بعد حفاظتی اہلکاروں سمیت شاکر کے اہل خانہ نے شاکر کو ڈھونڈ نکالنے کی ہر ممکن کوشش کی اور 7 آگست 2020 کو تلاشی آپریشن کے دوران فورسز اہلکاروں نے لندورہ گاؤں میں مغویہ اہلکار کے خون آلود کپڑے ایک باغیچے سے برآمد کیے۔ جبکہ منگل کو 414 دنوں بعد اس کی لاش ضلع کولگام کے مہن پورہ علاقے میں برآمد کی گئی۔
