شوپیاں (جموں کشمیر) : مسافر بردار گاڑیوں کی جانب سے ٹریفک قوانین کی خلاف ورزی کی شکایات موصول ہونے کے بعد اے آر ٹی او شوپیاں، شکیل احمد، نے ضلع کے مختلف مقامات پر ناکہ چیکنگ کی جس دوران انہوں نے اپنی ٹیم کے ہمراہ لوگوں کو دوران سفر ٹریفک کے اصولوں اور روڈ سیفٹی رولز کی پاسداری کے حوالے سے قوانین سے آگاہ کیا اور کہا کہ ’’یہ مسافروں کا اولین فرض ہے کہ وہ ڈرائیونگ کے وقت ڈرائیوروں کی جانب سے اوور لوڈنگ اور موبائل فون کے استعمال کے خلاف آواز بلند کریں۔‘‘
اے آر ٹی او شوپیان نے مسافر بردار گاڑیوں کے ڈرائیوروں کو متنبہ کیا کہ وہ محکمہ کی جانب سے کسی بھی کارروائی سے بچنے کے لیے ٹریفک قوانین پر سختی سے عمل کریں۔ چیکنگ کے دوران اوور لوڈنگ کے ذریعے مسافروں کی جان خطرے میں ڈالنے پر ایک ٹاٹا سومو (مسافر بردار) گاڑی کو اے آر ٹی او نے بلیک لسٹ کر دیا۔ اے آر ٹی او شوپیاں نے شہریوں پر بھی زور دیا کہ وہ اوور لوڈنگ یا دیگر ٹریفک کی خلاف ورزیوں کی فوری اطلاع محکمہ کو دیں۔ انہوں نے عوام سے کہا: ’’سڑک کی حفاظت اور قانون کی حکمرانی کو برقرار رکھنے میں عوامی تعاون کو اہم سمجھا جاتا ہے۔‘‘ انہوں نے مستقبل میں بھی اس طرح کی کارروائیاں جاری رکھنے کا عندیہ دیا۔
