ای ٹی وی بھارت کے مطابق رام بن اور بانہال کے درمیان ڈگڈول کے مقام پر درمیانی رات بھاری پسی گرآئی جس سے دونوں طرف ٹریفک کو بند کر دیا گیا۔
اکثر دیکھا جاتا ہے کہ رام بن سے بانہال کے درمیان اچانک شاہراہ پر مٹی کے تودے گِر آنے یا زمین کھسکنے کی وجہ سے شاہراہ پر آمد و رفت بند اور مسافر درماندہ ہو جاتے ہیں۔
انتظامیہ کی جانب سے کچھ روز قبل رام بن - بانہال کے درمیان قومی شاہراہ پر کھدائی کا کام بند کرنے کے احکامات صادر کئے گئے، تاہم زمینی سطح پر حکمنامے پر عمل آوری نہیں ہو رہی۔
چند تعمیراتی کمپنیوں اور ٹھیکہ داروں نے امتناعی احکمات کے باوجود شاہراہ پر کھدائی کا کام جاری رکھا ہے جس کا سارا خمیازہ مسافروں کو بھگتنا پڑتا ہے۔
انتظامیہ کی غفلت شعاری کے سبب عوام کو دقتوں کا سامنا کرنا پڑتا ہے۔ اچانک شاہراہ بند ہونے کے سبب متعدد مسافر درماندہ رہنے کے بجائے گھنٹوں پیدل سفر کرنے کو ہی ترجیح دیتے ہیں۔
مقامی لوگوں کا ماننا ہے کہ ’’غیر قانونی طور کھدائی کے سبب شاہراہ پر مٹی کے تودے گِر آتے ہیں اور شاہراہ آمد و رفت کے لئے بند ہو جاتی ہے۔‘‘
سرینگر - جموں قومی شاہراہ کو پورے سال آمد و رفت کے قابل بنانے کے لئے کتنی محنت، کتنا وقت اور کتنی رقم صرف ہوتی ہے یہ آنے والا وقت ہی بتائے گا۔
