جموں و کشمیر کے پہاڑی ضلع رامبن میں چندرکورٹ کے سیری علاقے میں پینے کے پانی کی عدم دستیابی کی وجہ سے رہائشیوں کو دقتوں کا سامنا کرنا پڑ رہا ہے۔
رہائشیوں نے بتایا کہ پینے کا پانی حاصل کرنے کے لیے مرد و زن کو میلوں کا سفر طے کرنا پڑتا ہے۔ انہوں نے کہا کہ گرمی کی شدت میں انہیں ندی نالوں اور چشموں سے پانی لانا پڑ رہا ہے۔
500 سے زائد آبادی والے اس علاقے میں محکمہ جل شکتی نے پانی کی پائپ نصب کی تھی جو اب بوسیدہ ہو چکی ہیں اور جگہ جگہ پانی لیک ہوتا رہتا ہے۔ وہیں علاقے میں پانی ذخیرہ کرنے کے لیے بنایا گیا حوض ہمیشہ خالی رہتا ہے جس کی وجہ سے کئی کئی دنوں تک پانی کی سپلائی منقطع رہتی ہے۔
مقامی لوگوں کا کہنا ہے کہ متعلقہ محکمہ اس بنیادی مسئلے کو حل کرنے اور علاقے میں پانی کی سپلائی کو یقینی بنانے کی جانب کوئی توجہ نہیں دے رہا۔ ان کے مطابق انہوں نے اس ضمن میں کئی بار اعلیٰ افسران کی توجہ مبذول کرائی تاہم کھوکھلے وعدوں کے سوا کچھ حاصل نہیں ہوا۔
