جموں و کشمیر کے ضلع رامبن میں تقریبا گیارہ ماہ کے بعد آج بانہال اور بارہمولہ ریل خدمات کو شروع کردیا گیا ہے، جس سے مسافروں نے راحت کی سانس لی ہے۔
آج بانہال سے بارہمولہ کے درمیان صرف دو ٹرینیں چلائی گئیں، جن میں سے ایک بانہال اور دوسری ٹرین بارہمولہ سے چلائی گئی۔
مقامی لوگوں نے حکومت کی جانب سے ریل خدمات کو بحال کرنے کا خیرمقدم کر تے ہوئے کہا کہ ریل سروس بحال ہونے سے مسافر، مریض اور طلباء کو کافی راحت پہنچی ہے، اس کے علاوہ ریلوے اسٹیشن بانہال کے ہوٹل، ڈھابوں اور دوکاندار کو بھی روزگار میسر ہوگا۔
ٹیکسی چلانے والے ڈرائیور نے بھی سرکار کے فیصلے کا شکریہ ادا کیا، انھوں نے کہا کہ گزشتہ گیارہ ماہ سے ریل خدمات بند رہنے کی وجہ سے مالکان کو گاڑیوں کی قسط ادا کرنا مشکل ہوگیا تھا، جس کی وجہ سے انھیں کافی پریشانیوں کا سامنا کرنا پڑا۔
انہوں نے سابقہ ممبر اسمبلی وقار رسول وانی کا بھی شکریہ ادا کیا، جنہوں نے ریل سروس بحال کرنے کی کوشش کرتے ہوئے گزشتہ دنوں احتجاجی مظاہرہ بھی کیا۔
واضح رہے کہ ریل خدمات بند ہونے سے ریلوے کو بھی کروڑوں روپے کا نقصان ہونے کے ساتھ ساتھ مقامی ہوٹلوں، دکانداروں، ٹرانسپورٹروں کو بھی لاکھوں کا نقصان برداشت کرنا پڑا۔
