پہاڑی ضلع رامبن کے گاندھری علاقے میں گزشتہ شب آتشزدگی کے ایک بھیانک واقعہ میں مختلف عمارتیں خاکستر ہوگئیں۔ سرکاری ذرائع کے مطابق گزشتہ شب دیر گئے ایک دکان میں آگ لگ گئی۔ آگ کے شعلوں نے آناً فاناً متصل دکانوں سمیت رہائشی مکان کو بھی اپنی زد میں لے لیا۔
انہوں نے بتایا کہ آگ کی اس واردات میں کم از کم چھ دکانیں اور ایک رہائشی مکان مکمل طور پر خاکستر ہو گئے جبکہ تین نجی گاڑیاں بھی جل کر خاکستر ہو گئیں۔
مقامی آبادی نے محکمہ فائر اینڈ ایمرجنسی کے تئیں ناراضگی کا اظہار کرتے ہوئے کہا کہ 'فائر اینڈ ایمرجنسی صرف بیس کلو میٹر کی دوری پر ہے۔ اس کے باوجود وہ اطلاع ملنے کے تقریباً دو گھنٹے کے بعد آگ بجھانے پہنچے۔
لوگوں نے کہا کہ فائر اینڈ ایمرجنسی کے دیر سے آنے کے سبب لاکھوں کی املاک خاکستر ہو گئیں۔ مقامی لوگوں کے مطابق 'اگر فائر اینڈ ایمرجنسی کا عملہ جلد پہنچ جاتا تو اتنا نقصان نہیں ہوا ہوتا۔'
مقامی افراد نے کہا کہ آتشزدگی کے واقعہ میں لاکھوں روپے مالیت کی اشیاء خاکستر ہو گئیں۔ وہیں، اس ضمن میں پولیس نے آگ لگنے کی وجوہات جاننے کیلئے کیس درج کر کے مزید تحقیقات شروع کر دی ہے۔
دریں اثنا ضلع ترقیاتی کمشنر رامبن نے اے ڈی سی رامبن کی سربراہی میں ایک ٹیم تشکیل دی ہے جو نقصان کا جائزہ لے کر رپورٹ پیش کرے گی۔ رپورٹ ملنے کے بعد متاثرہ افراد کی امداد کی جائے گی۔
