ضلع رام بن کے تحصیل ہیڈ کوارٹر بانہال سے محض دو کلو میٹر کی دوری پر واقع ڈلیگام پنچایت کے لون پورہ کا علاقہ اس دور جدید میں بھی پل سے محروم ہے۔
پل نہ ہونے کے سبب ڈلیگام، لون پورہ کے باشندوں کو گونا گوں دقتوں کا سامنا کرنا پڑ رہا ہے۔
ای ٹی وی بھارت کے ساتھ بات کرتے ہوئے مقامی باشندوں نے بتایا کہ ندی کو پار کرنے کے لیے لوگ از خود لکڑی کا عارضی پل تعمیر کرتے ہیں جو اکثر و بیشتر پانی کے تیز بہائو میں گر جاتا ہے۔
انہوں نے مزید کہا کہ ندی میں پانی کے تیز بہائو کے دوران طلبہ اسکول بھی نہیں جا پاتے۔
مقامی لوگوں نے انتظامیہ کو تنقید کا نشانہ بناتے ہوئے کہا کہ گذشتہ دنوں ایک مقامی نوجوان حادثے کے دوران ہلاک ہو گئے تھے اور علاقے میں پل نہ ہونے کے سبب لوگ ان کے گھر تعزیت کے لیے بھی نہیں جا سکے۔
ای ٹی وی بھارت کے ساتھ بات کرتے ہوئے مقامی باشندوں نے سیاسی جماعتوں اور لیڈران کو تنقید کا نشانہ بناتے ہوئے کہا کہ ’’سیاسی رہنما صرف ووٹ مانگنے کے لیے یہاں آتے ہیں، تاہم انتخابات ختم ہوتے ہی وہ ہمیں بھول جاتے ہیں۔‘‘
علاقے میں پل کی تعمیر کے حوالے سے مقامی باشندوں نے متعدد بار انتظامیہ اور سیاسی پارٹیوں کے دفاتر کے چکر کاٹے تاہم ان کے مطابق انہیں ہر در سے مایوس ہو کر ہی لوٹنا پڑا۔
