ضلع راجوری کے میونسپل کمیٹی تھنہ منڈی کے وارڈ نمبر آٹھ کے لوگوں نے وارڈ ممبر کے ہمراہ آئی او میونسپل کمیٹی تھنہ منڈی پر الزام عائد کرتے ہوئے کہا کہ جب سے میونسپل کمیٹی کے الیکشن ہوئے ہیں۔ تب سے آج تک وارڈ کو سرکار کی طرف سے دیے جانے والے پیسے میں سے برابر حصہ نہیں ملا۔
اس تعلق سے وارڈ نمبر آٹھ کے لوگوں نے وارڈ کے اندر جمع ہوکر احتجاج کیا۔ احتجاج کے دوران شمیم احمد مغل حاجی مقبول احمد رینا، عبدالحمید ڈار حمید، میر شکور احمد و دیگر نے الزام عائد کیا ہے کہ میونسپل کمیٹی تھنہ منڈی ہمارے وارڈ کے ساتھ سوتیلا سلوک کررہی ہے، جس کی وجہ سے وارڈ کی تعمیر و ترقی نہیں ہورہی ہے۔
یہ بھی پڑھیں:راجوری: ضلع ترقیاتی کمشنر کا دورہ
انہوں نے کہا کہ جب سے ہمارے وارڈ کا ممبر چنا ہوا ہے تب سے آج تک صرف ڈیڑھ لاکھ روپے کا کام ہوا ہے۔ اس وارڈ میں لوگوں کو نہ ہی مکان دیے گئے ہیں اور نہ ہی بجلی کی سلائٹ دی گئی ہے۔ جو بھی پیسہ سرکاری خزانے سے تعمیر و ترقی کے لے آتا ہے اس کا حصہ برابر نہیں مل رہا۔ میونسپل کمیٹی کی حدود میں رہنے والے لوگوں نے انتظامیہ سے گزارش کی ہے کہ انہیں پنچایت کے ساتھ جوڑا جائے تاکہ وارڈ میں نریگا جیسی اسکیموں سے فائدہ مل سکے۔
