کراس بارڈر فائرنگ میں فوجی افسر ہلاک

جموں و کشمیر کے ضلع راجوری میں لائن آف کنٹرول کے نزدیک کراس بارڈر فائرنگ میں جے سی او (جونیئر کمیشنڈ افسر) کے ہلاک ہونے کی اطلاع ہے۔

تفصیلات کے مطابق پیر کی شام چھ بجے ضلع راجوری کے نوشہرا سیکٹر میں لائن آف کنٹرول پر پاکستانی فوج نے جنگ بندی کی خلاف ورزی کرتے ہوئے بلا اشتعال فائرنگ کی جس کے نتیجے میں فوج کا ایک جونیئر کمیشنڈ آفیسر (جے سی او) ہلاک ہوگیا۔

ہلاک ہونے والے جے سی او کی شناخت سُکھ دیو کے طور پر ہوئی ہے۔

دفاعی ذرائع نے بتایا کہ پاکستانی فوج نے ایل او سی پر بھارتی چوکیوں کے علاوہ عام شہری والے علاقوں جن میں بابا کھوری، کدالی، سری، مکری شامل ہیں، کو بھی نشانہ بناتے ہوئے شدید گولہ باری کی۔

دفاعی ذرائع نے بتایا کہ پاکستانی فائرنگ میں جے سی او سُکھ دیو زخمی ہوئے تھے، تاہم وہ زخموں کی تاب نہ لاکر دم توڑ بیٹھے۔ انہوں نے بتایا کہ بھارتی فوج موثر انداز میں جوابی کارروائی کر رہی ہے۔