حضرت خواجہ غریب نوازؒ کے 809 ویں عرس کے موقع پر مرکزی حکومت کی جانب سے بھی ایک چادر پیش کی گئی۔ یہ چادر وزیراعظم نریندر مودی کی جانب سے مرکزی وزیر برائے اقلیتی امور مختار عباس نقوی خود لے کر دربار خواجہ اجمیر شریف پہنچے اور انہوں نے خواجہ کے روضہ پر وزیراعظم کی طرف سے چادر پوشی کی۔
نقوی آج صبح ساڑھے نو بجے دہلی سے بذریعہ ہوائی جہاز اجمیر پہنچے اور 10:30 بجے اجمیر کے کشن گڑھ ہوائی اڈے پر اترے ۔ گیارہ بجے انہوں نے خواجہ غریب نوازؒ کی درگاہ میں وزیراعظم نریندر مودی کی جانب سے چادر پیش کی۔
وزیراعظم مودی نے اس موقع پر ایک پیغام بھی بھیجا تھا جس وہاں وزیر موصوف نے پڑھ کر سنایا۔ وزیراعظم نے اپنے پیغام میں خواجہ اجمیری کے 809 ویں سالانہ عرس کے موقع پر ہندوستان اور پوری دنیا میں ان کے پیروکاروں کو سلام اور مبارک باد پیش کی۔
انہوں نے اپنے پیغام میں کہا کہ خواجہ معین الدین چشتی کے سالانہ عرس پر درگاہ اجمیر شریف پر چادر بھیجتے ہوئے میں انہیں خراج عقیدت پیش کرتا ہوں۔ مودی کے پیغام میں امید ظاہر کی گئی ہے کہ آنے والا سالانہ عرس پوری دنیا میں امن اور خوشحالی کا پیغام لائے۔
ساتھ میں وزیراعظم نریندر مودی نے دربار خواجہ میں پورے ملک کے لیے امن و امان کے لیے دعا کرانے کی بھی اپیل کی۔
خیال رہے کہ مختار عباس نقوی کے اس خاص پروگرام کے سلسلے میں ضلعی پولیس نے سیکورٹی کے سخت ترین انتظامات کیے تھے۔ مختار عباس نقوی نے چادر پیش کرنے کے بعد وہاں جاری نئی تعمیرات کا اجراء بھی کیا۔
