جے پور: وزیر اعظم نریندر مودی نے راجستھان کے اراکین اسمبلی اور ریاستی وزراء کو مشورہ دیا کہ وہ "گروپ بندی اور بدعنوانی سے دور رہیں"۔ وزیراعظم مودی جے پور کے تین روزہ دورہ پر ہیں۔ مودی نے جمعہ کی رات جے پور میں پارٹی کے ریاستی دفتر میں اراکین اسمبلی، ریاستی وزراء اور بی جے پی کے عہدیداروں سے بات چیت کی۔
وزیر اعظم مودی نے اراکین اسمبلی سے کہا کہ "آپ کو گروپ بندی اور بدعنوانی سے دور رہنا ہوگا۔ پارٹی آپ کی تمام سرگرمیوں پر نظر رکھے ہوئے ہے"۔ انہوں نے اراکین اسمبلی سے مزید کہا کہ وہ صرف پانچ سالہ دور کو ذہن میں رکھ کر کام نہ کریں۔ "ہمیں اس چیز کو ذہن میں رکھتے ہوئے آگے بڑھنا ہے کہ بی جے پی کی حکومت پانچ سال بعد قائم ہوگی"۔
وزیر اعظم نے انہیں یہ بھی مشورہ دیا کہ وہ ان بوتھوں کا دورہ کریں جہاں سے وہ انتخابات میں شکست کھا گئے تھے اور پھر جہاں سے وہ جیتے تھے وہاں جائیں اور پھر دونوں وجوہات کا پتہ لگائے اور اس پر عمل کریں۔ مودی نے مزید کہا کہ "آپ کو حکومت کے نشے میں نہیں رہنا چاہیے۔ زمین پر زیادہ سے زیادہ کام کرنا ہے تاکہ ریاست میں پانچ سال بعد دوبارہ حکومت قائم ہوسکے"۔
