سچن پائلٹ نے کانگریس صدر سے ان کی رہائش گاہ پر ملاقات کے بعد نامہ نگاروں کو بتایا کہ انہوں نے سونیا گاندھی سے کہا کہ راجستھان میں جلد ہی کابینہ کی توسیع ہونے والی ہے اور پارٹی کے لیے کام کرنے والے لوگوں کا بھی احترام کیا جانا چاہیے۔
گہلوت کے بعد ان کی بات چیت کے بارے میں کانگریس صدر کے سوال پر پائلٹ نے کہا کہ یہ بہت اچھی بات ہے کہ سونیا گاندھی وہاں کے لیڈروں سے راجستھان کے بارے میں مسلسل جانکاری لے رہی ہیں کہ پارٹی کو پھر سے عروج پر لے جانے کے کیا طریقے ہیں۔
انہوں نے کہا کہ ریاستی کانگریس سے وابستہ تمام لیڈروں کو اس بات پر توجہ دینے کی ضرورت ہے کہ راجستھان میں انتخابات جیتنے کے بعد پارٹی کس طرح واپس آئی۔
انہوں نے کہا کہ پارٹی کے ریاستی انچارج جنرل سکریٹری اجے ماکن اس بارے میں مناسب فیصلہ کریں گے کہ راجستھان میں کانگریس کو مضبوط کرنے اور اس کی اقتدار میں واپسی کو یقینی بنانے کے لیے کس قسم کے فیصلے کئے جائیں۔
کانگریس لیڈر نے کہا کہ راجستھان میں کانگریس کی واپسی کے لیے سب کو زمینی سطح پر مل کر کام کرنے کی ضرورت ہے۔ ریاست میں 2023 میں اسمبلی انتخابات ہیں اور اب اس کے لیے دو سال سے بھی کم وقت باقی ہے، اس لیے سب کو مل کر تنظیم کو مضبوط کرنا ہوگا۔
یہ بھی پڑھیں: راجستھان حکومت سے پٹرول ڈیزل پر ویٹ میں تخفیف کا مطالبہ
انہوں نے کہا کہ کابینہ کی توسیع میں تجربہ، علاقائی توازن، ذات پات کی ساخت کو مدنظر رکھتے ہوئے فیصلے کرنے ہوں گے اور ان تمام مسائل پر محترمہ گاندھی سے بات ہوئی ہے۔ تنظیم میں اہم رول ملنے کے سوال پر انہوں نے کہا کہ ان تمام مسائل پر محترمہ گاندھی سے بات چیت ہوئی ہے۔
یو این آئی
