جے پور: مدرسہ پیرا ٹیچرز کا غیر معینہ مدت کیلئے احتجاج شروع

راجستھان کے مدرسہ پیرا ٹیچرز جے پور میں واقع شہید اسمارک پر احتجاج کر رہے ہیں۔ مدرسوں میں بچوں کو ہندی، انگلش سمیت دیگر مضامین کی تعلیم دینے والے مدرسہ پیرا ٹیچرز کا مطالبہ ہے کہ ان کی ملازمت کو مستقل کیا جائے۔

جے پور: ریاست راجستھان کے مدرسہ پیرا ٹیچرز اپنی ملازمت کو مستقل کرنے کے مطالبے پر آج سے جے پور میں شہید اسمارک پر غیر معینہ مدت کے لیے دھرنے پر بیٹھ گئے ہیں۔ راجستھان کے تمام مدرسوں کے پیرا ٹیچر اس احتجاجی مظاہرہ میں حصہ لینے کے لیے پہنچے ہیں۔ اس دوران مظاہرین نے حکومت کے خلاف جم کر نعرے بازی بھی کی۔

اس احتجاج کی قیادت کرنے والے شمشیر خان کا کہنا ہے کہ مدرسہ پیرا ٹیچرز گذشتہ ایک طویل عرصہ سے خود کو مستقل کرنے کے کا مطالبہ کر رہے ہیں، لیکن راجستھان کی کانگریس حکومت کی جانب سے ہر بار جھوٹا وعدہ کیا گیا۔ ہمیں بھروسہ دیا گیا کہ ہم لوگوں کو مستقل کردیا جائے گا، لیکن ایسا نہیں ہوا۔ اب ہم لوگوں نے کمر کس لی ہے اور جب تک راجستھان حکومت ہمارے مطالبات کو پورا نہیں کرتی تب تک یہ احتجاج جاری رہے گا۔

واضح رہے کہ کانگریس حکومت نے 30 ستمبر تک ان ٹیچرز کو مستقل کرنے کا وعدہ کیا تھا، لیکن حکومت نے ابھی تک اپنے اس وعدے کو مکمل نہیں کیا ہے۔