راجستھان: گہلوت کابینہ میں ردوبدل کا امکان

راجستھان کی کابینہ میں ردوبدل اور توسیع کا اشارہ ملنے کا امکان ہے، راجستھان کے وزیر اعلیٰ اشوک گہلوت کے آفیسر آن اسپیشل ڈیوٹی (او ایس ڈی) نے بتایا کہ ڈاکٹرز نے گہلوت کو 'ون آن ون' ملاقات سے پرہیز کرنے کا مشورہ دیا ہے۔

او ایس ڈی لوکیش شرما نے بتایا کہ " وزیراعلیٰ کی کورونا رپورٹ مثبت آنے کے بعد ڈاکٹرز نے انہیں لوگوں سے ملاقات کرنے سے پرہیز کرنے کی ہدایت دی ہے جس کے سبب اب وزیراعلیٰ تمام قسم کی میٹنگز اور ملاقات ویڈیو کانفرنس کے ذریعہ کریں گے۔

انہوں نے کہا کہ ڈاکٹرز کے مطابق وزیراعلیٰ ایک یا دو ماہ تک صرف ویڈیو کانفرنس سے ہی ملاقاتیں کریں۔

انہوں نے مزید بتایا کہ " گزشتہ روز کورونا کے پیش نظر غیر معمولی طریقے سے میٹنگز منعقد کی گئیں، جس میں 15 تا 16 ماہ میں تقریباً 355 ویڈیو کانفرنس ہوچکی ہیں، ان کانفرنس میں دیہات کے پنچوں اور سرپنچوں نے بھی شرکت کی۔"

اس بیان کے بعد کابینہ کی تبدیلی پر سوالیہ نشان کھڑے ہوگئے ہیں، وہیں راجستھان کانگریس کے صدر گووند سنگھ ڈوتاسرا نے ہفتے کے روز کہا تھا کہ ریاست میں جلد ہی کابینہ میں رد وبدل ہوگا۔ انہوں نے زور دیا کہ پارٹی کی ریاستی اکائی میں کوئی مسئلہ نہیں ہے۔