یوگا گرو بابا رام دیو کی کمپنی پتنجلی میں ڈیری کاروبار کے سی ای او 57 سالہ سنیل بنسل کی کورونا سے موت ہوگئی ہے۔ انہیں جے پور کے ایک اسپتال میں داخل کرایا گیا تھا۔
سنیل بنسل کووڈ ۔19 سے متاثر ہونے کے بعد جے پور کے راجستھان اسپتال میں داخل تھے۔ لیکن اسپتال میں ان کی صحت مستقل بگڑتی رہی۔
جب ای ٹی وی بھارت نے راجستھان اسپتال کے ڈائریکٹر ڈاکٹر ایس ایس اگروال سے بات کی تو انہوں نے تصدیق کی کہ ان کے یہاں سنیل بنسل کے نام سے ایک مریض داخل ہوئے تھے۔ سنیل بنسل کی زیادہ طبیعت خراب ہونے کے سبب وہ فوت ہوگئے۔
ڈاکٹر اگروال کے مطابق بنسل کے پھیپھڑوں میں انفیکشن کافی حد تک بڑھ گیا تھا جس کی وجہ سے ان کی موت ہوگئی۔ سنیل بنسل کی کورونا انفیکشن سے موت کی تصدیق بھی ان کے بھائی تجار والا ایس کے نے اپنے ٹویٹر اکاؤنٹ پر کی ہے۔
واضح رہے کہ حال ہی میں بابا رام دیو نے ایلوپیتھی کے بارے میں ایک بیان دیا تھا جس میں ایلوپیتھی کو کوڑا کرکٹ اور دیوالیہ سائنس کہا تھا۔ جس کے بعد انڈین میڈیکل ایسوسی ایشن نے اس بیان پر اعتراض کیا۔
حالانکہ اس کے بعد مرکزی وزیر صحت ڈاکٹر ہرش وردھن نے بابا رام دیو کو بیان واپس لینے کو کہا جس کے بعد بابا رام دیو نے اپنے بیان پر افسوس کا اظہار کیا اور بیان واپس لینے کی بات کہی تھی۔
