ریاست راجستھان کے دارالحکومت جے پور کے دورے پر آئے آل انڈیا مجلس اتحاد المسلمین (اے آئی ایم ای ایم) کے صدر اسد الدین اویسی نے اعلان کیا کہ وہ جلد ہی راجستھان کی سیاست میں قدم رکھنے والے ہیں۔ ان کے اس اعلان کے بعد سیاسی پارٹیوں میں ہل چل دیکھنے کو مل رہی ہے۔
گذشتہ روز اے آئی ایم آئی ایم کے صدر اسد الدین اویسی جے پور کے دورے پر تھے۔ اس دوران انہوں نے راجستھان کے دارالحکومت جے پور میں مسلم تنظیموں کے عہدیداران سے ملاقات کی اور جے پور سے حیدرآباد جاتے وقت ایک بڑا اعلان کرتے ہوئے کہا تھا کہ وہ راجستھان میں جلد ہی اپنی پارٹی کی لانچنگ کرنے جارہے ہیں۔ ان کے اس بیان کے بعد راجستھان کی مسلم تنظیموں کے عہدیداران ان کی حمایت میں بیان دیتے ہوئے نظر آرہے ہیں۔
مسلم تنظیموں کے عہدیداران کا کہنا ہے کہ راجستھان میں کسی تیسری پارٹی کے نہیں ہونے کی وجہ سے ریاست میں ایک مرتبہ کانگریس اور دوسری مرتبہ بی جے پی ہی اپنی حکومت بناتی ہے۔ اسد الدین اویسی کے ذریعہ راجستھان میں پارٹی لانچ کرنے کا اعلان قابل تعریف ہے۔
مزید پڑھیں:Asaduddin Owaisi: کیا اویسی 2022 انتخابات میں مسلمانوں کا اعتماد جیت سکیں گے؟
مسلم تنظیموں کے عہدیداران کا کہنا ہے کہ بی جے پی اور کانگریس دونوں ہی اپنی اپنی من مانی کرتی ہیں۔ اس لیے یہاں پر تیسری پارٹی کا ہونا بہت ضروری ہے۔ ہم لوگ کافی خوش ہیں کہ اسد الدین اویسی نے گذشتہ روز جو بیان دیا ہے، اس کا ہم استقبال کرتے ہیں۔ ان کی پارٹی کی لانچنگ کے وقت ہم تمام لوگ اسدالدین اویسی کا دلی استقبال کریں گے۔ ان کا کہنا ہے کہ ہندوستان کا آئین تمام سیاسی پارٹیوں کو الیکشن لڑنے کی اجازت دیتا ہے، اس لیے اویسی کو راجستھان میں جلد ہی اپنی پارٹی کا اعلان کردینا چاہیے۔
