جےپور: کورونا گائیڈ لائن کے مطابق یوم عاشورہ منایا جارہا ہے

جےپور میں کورونا گائیڈ لائن کے مطابق محرم الحرام کے تمام رسم و روایت چند لوگوں کی موجودگی میں ادا کی جا رہی ہے۔

جےپور: اسلامی سال کی پہلے ماہ کے دس تاریخ کو منایا جانے والا محرم الحرام آج جمعہ کے روز بڑے ادب و احترام کے ساتھ منایا جارہا ہے۔

ملک میں جاری کورونا گائیڈ لائن کے مطابق محرم الحرام کے تمام رسم و روایت چند لوگوں کی موجودگی میں مکمل کی جا رہی ہے۔ وہیں عقیدت مند اپنے گھروں میں ہی حضرت امام حسین رضی اللہ تعالی عنہ کے نام کی نیاز کررہے ہیں جبکہ دیگر پروگراموں کا بھی اہتمام کیا جارہا ہے۔

اس موقع پر جےپور میں واقع امام باڑے کے ذمہ داران کی جانب سے کورونا گائیڈ لائن پر عمل کرتے ہوئے عقیدت مندوں کو تعزئے کی زیارت کرائی جارہی ہے۔

وہیں اس سلسلے میں عزاداروں کا کہنا ہے کہ راجستھان حکومت کی جانب سے جاری گائیڈ لائن کے مطابق تعزیہ کو باہر نہیں نکالا جائے گا، اور نہ ہی کسی طرح کا کوئی جلوس نکالا جائے گا۔ کورونا گائڈلائن کے پیش نظر انتظامیہ کی جانب سے جےپور کے دیگر علاقے میں کثیر تعداد میں پولیس کی تعیناتی کی گئی ہے۔