رسول اکرم نبی پاک حضرت محمد مصطفی صلی اللہ علیہ وسلم کی یوم ولادت کی آمد کے موقع پر مسرت اور جشن کا ماحول دیکھا جارہا ہے۔ ہربرس کی طرح رواں برس بھی آمد رسول جشن کی تیاریاں شروع ہوگئی ہیں۔ لیکن اس مرتبہ کورونا وبا کے مدنظر حکومت کی گائیڈ لائن کا خاص احترام کیا جائے گا۔
اس سلسلے میں ریاست راجستھان کی اجمیر شریف درگاہ میں جشن رحمت اللعالمین کا آغاز ہو چکا ہے۔ عقیدت مند جشن آمد رسولﷺ کی محفل کا اہتمام کر رہے ہیں۔ خاص بات یہ ہے کہ رواں برس کورونا وبا گائیڈ لائن کا خیال رکھا جا رہا ہے۔ زائرین سماجی فاصلہ اور ماسک کا بھی استعمال کررہے ہیں۔
اس موقع پر درگاہ اجمیر شریف خادموں کی تنظیم شیخ زادگان کے سیکریٹری احتشام چشتی نے کہا سلطان الہند حضرت خواجہ غریب نواز رحمتہ اللہ علیہ کی بارگاہ میں عید میلاد النبی کے موقع پر درگاہ کو خوبصورت روشنی سے سجایا جاتا ہے۔ اور میلاد کی محفل کا اہتمام کیا جاتا ہے جس میں ملک بھر سے کثیر تعداد میں زائرین اجمیر آتے ہیں اور نیاز و نذر کے ساتھ لنگر تقسیم کر جشن آمد رسول مناتے ہیں۔
ہر برس اجمیر میں عقیدت مند جلوس اور جلسہ منعقد کرتے ہوئے جشن مناتے ہیں۔ لیکن اس بار کورونا وبا کی وجہ سے حکومت ہند کی گائیڈ لائن پر عمل کرتے ہوئے جشن منایا جائے گا۔
یہ بھی پڑھیں:پنجاب کے بعد راجستھان اسمبلی میں زرعی قوانین کے خلاف قرارداد پیش ہوگی
