اننت ناگ (میر اشفاق): قدرتی خوبصورتی کی بدولت وادی کشمیر کو پوری دنیا میں ایک منفرد پہچان ہے، یہاں کے دلکش اور دلفریب سیاحتی مقامات ملکی و غیر ملکی سیاحوں کو اپنی طرف متوجہ کرتے ہیں، تاہم جنت کے اس ٹکرے پر قدرتی حُسن سے مالامال ایسے مقامات بھی موجود ہیں جو دنیا کی نظروں سے اوجھل ہیں۔ ایسی ہی ایک حسین جگہ ضلع اننت ناگ کے شانگس علاقہ میں موجود ہے جسے چھتہ پل کے نام سے جانا جاتا ہے۔ یہ جگہ ضلع صدر مقام اننت ناگ سے تقریباً 35 کلو میٹر کی دوری پر پیر پنچال کی سرسبز اور بلند پہاڑیوں کے درمیان واقع ہے۔ یہ ایسی حسین جگہ ہے جو ہر موسم میں خوبصورت اور جاذب نظر رہتی ہے۔
مشہور مغل باغ اچھہ بل کی سیرو تفریح پر آنے والے اکثر و بیشتر سیاح چھتہ پل کا رخ کرتے ہیں... چھتہ پل کی شاداب وادی کے وسط میں ایک صاف و شفاف نہر رواں دواں ہے جو اس جگہ کی خوبصورتی میں مزید دوبالا کر دیتی ہے ۔۔یہاں آنے والے مقامی سیاح نہ صرف اس جگہ کے خوشگوار ماحول کا لطف لیتے ہیں بلکہ سرسبزو کوہساروں کے بیچ بہہ رہی ندی کے کنارے پُر سکون لمہات گزار کر اپنے جسم و ذہن کو تروتازہ کرتے ہیں۔
تاہم دوسری جانب مذکورہ خوبصورت مقام پر بنیادی سہولیات میسر نہ ہونے کی وجہ سے اس جگہ کی سیاحتی سرگرمیاں کافی متاثر ہو رہی ہیں۔خاص کر چھتہ بل کے اندورنی حصہ میں رابطہ سڑک اور بیت الخلاء کی عدم دستیابی سے سیاحوں کو دقتیں پیش آرہی ہیں، اس خاص حصہ کی تجدید ومرمت کا کام بھی عمل میں نہیں لایا جارہا ہے ،جس سے اس جگہ کی شان متاثر ہوئی ہے۔
مقامی لوگوں کا کہنا ہے کہ حکومت نے اس جگہ کو مکمل طور نظر انداز کیا ہے یہی وجہ ہے کہ یہ خوبصورت مقام دنیا کی نظروں سے ابھی بھی اوجھل ہے۔ انہوں نے کہا کہ مرگن ٹاپ، ژوہر ناگ، اور دیگر کئی سیاحتی مقامات چھتہ پل کے بلکل قریب ہیں۔ان سیاحتی مقامات کو آپس میں جوڑنے اور اس جگہ پر سیاحت کو فروغ دینے کے لئے حکومت نے چھتہ پل سے،ژوہر ناگ مرگن ٹاپ تک ایک گنڈولہ قائم کرنے کا خواب دکھایا گیا تھا ،تاہم وہ خواب ابھی تک شرمندہ تعبیر نہیں ہوا۔
مزید پڑھیں: کشمیر کے لیے ٹرین کے افتتاح کی تیاریاں شروع، تاریخ کے بارے میں تصدیق نہیں
مقامی لوگوں کا کہنا ہے کہ ان کا علاقہ معاشی لحاظ سے کافی پسماندہ ہے، روزگار کی تلاش میں انہیں دوسرے علاقوں کا رخ کرنا پڑتا ہے، تاہم افسوس ہے کہ سیاحتی وسائل موجود ہونے کے باوجود اُن وسائل کو بروئے کار نہیں لایا جا رہا ہے، مقامی لوگوں کا مطالبہ ہے کہ اس جگہ کو سیاحتی نقشہ میں لانے اسے فروغ دینے اور اس جگہ پر گنڈولا قائم کرنے کے لئے سنجیدہ اقدامات اٹھائے جائیں۔
