نئی دہلی: کانگریس نے پیر کو کہا کہ راجستھان کے وزیر اعلی اشوک گہلوت اور پارٹی لیڈر سچن پائلٹ ریاست میں آئندہ اسمبلی انتخابات متحد ہو کر لڑیں گے۔ کانگریس صدر ملکارجن کھڑگے نے پارٹی کے سرکردہ لیڈران راہل گاندھی اور کے سی وینوگوپال کی موجودگی میں اشوک گہلوت اور پائلٹ کے ساتھ اس سلسلے میں میٹنگ کی۔ وینوگوپال نے میٹنگ کے بعد نامہ نگاروں کو بتایا کہ ملکارجن کھڑگے اور راہل گاندھی نے گہلوت اور پائلٹ کے ساتھ چار گھنٹے تک تفصیلی بات چیت کی۔ ہم نے متحد ہو کر الیکشن لڑنے کا فیصلہ کیا ہے۔ انہوں نے کہا کہ دونوں متفق ہیں، ہمیں ایک ساتھ جانا ہوگا۔ یہ بھارتیہ جنتا پارٹی (بی جے پی) کے خلاف مشترکہ لڑائی ہوگی۔ ہم راجستھان میں جیتیں گے۔ راجستھان میں اس سال کے آخر میں اسمبلی انتخابات ہونے کا امکان ہے۔
وہیں راجستھان کے وزیر اعلی اشوک گہلوت پیر کی شام یہاں پرتھوی راج روڈ پر راجستھان ہاؤس کی تعمیر نو کے کام کا سنگ بنیاد رکھا۔ وزیر اعلیٰ نے کہا کہ راجستھان حکومت نے پانی، تعلیم، سڑکیں اور صحت سمیت ریاست کی ہمہ جہت ترقی میں ریکارڈ قائم کیا ہے۔ چیف منسٹر چرنجیوی ہیلتھ انشورنس اسکیم کے تحت 25 لاکھ روپے کے مفت علاج جیسی سہولت کسی اور ریاست میں نہیں ہے۔ گہلوت نے کہا کہ تاریخی راجستھان ہاؤس کی تعمیر نو ہماری ترجیح رہی ہے۔ راجستھان سے دہلی آنے والے زائرین کو نئے ہاؤس میں اعلیٰ سہولیات ملیں گی۔ اس ریاستی گیسٹ ہاؤس کی تعمیر نو میں راجستھان کے فنکارانہ طرز تعمیر کو خوبصورتی سے ہم آہنگ کیا جائے گا۔
