ریاست راجستھان کے اجمیر شہر میں صوفی حضرت خواجہ معین الدین چشتی کی درگاہ میں بھی کورونا وائرس کو لے کر درگاہ کمیٹی اور انجمن سید زادگان کی جانب سے بھی حفاظت کے ہر ممکن انتظامات کیے جا رہے ہیں۔
سلطان الہند حضرت خواجہ معین الدین چشتی کی درگاہ اجمیر شریف، جہاں لاکھوں زائرین و عقیدتمند زیارت کرنے پہنچتے ہیں۔اس لیے ان کی حفاظت کو یقینی بنانا بھی ضروری ہے۔
ایسے میں عالمی دہشت کا سبب بنے کورونا وائرس سے زائرین کو بچانے اور ان کی حفاظت کے لیے درگاہ شریف میں سوڈیم ہائپو کلورائیڈ کا اسپرے کیا جارہا ہے۔
اس کے علاوہ درگاہ کمیٹی کے معرفت اسکریننگ کیمپ لگائے جائیں گے ۔
خیال رہے کہ ریاست راجستھان کے وزیراعلی اشوک گہلوت کی صدارت میں جے پور میں ہوئی میٹنگ میں اس تعلق سے درگاہ کمیٹی کے نمائندوں سمیت درگاہ دیوان کے بیٹے سید نصیر الدین چشتی اور درگاہ شریف کے خادموں کی انجمن کے نمائندوں نے شرکت کی اور اجمیردرگاہ آنے والے زائرین کو کورونا وائرس سے بچانے کے ہر ممکن انتظام کرنے کا وعدہ کیا۔
کورونا وائرس کے چلتے اجمیر شریف درگاہ میں آنے والے زائرین کی تعداد میں کمی ہوگئی ہے یہی وجہ ہے کہ ہمیشہ زائرین سے گلزار رہنے والی درگاہ اب خالی خالی نظر آ رہی ہے۔
