راجستھان میں گہلوت حکومت کی جانب سے تین مرتبہ گورنر کلراج مشرا کو خط لکھ کر اسمبلی سیشن بلانے گذارش کی گئی تھی تاہم گورنر نے ریاستی حکومت کی درخواست کو نامنظور کردیا۔
گورنر کے رویہ سے ناراض این ایس یو آئی کا کارکن بی جے پی کے ریاستی دفتر کے باہر احتجاج کیا اور مرکزی حکومت کے خلاف جم کر نعرے بازی کی، دریں اثنا بی جے پی یوتھ ونگ کے ارکان بھی وہاں جمع ہوگئے اور انہوں نے گہلوت حکومت کے خلاف نعرے بازی شروع کردی۔
بعدازاں پولیس نے موقع پر پہنچ کر دونوں پارٹیوں کے ارکان کو منتشر کردیا اور بی جے پی دفتر کے باہر بھاری تعداد پولیس جوانوں کو تعینات کردیا۔
راجستھان این ایس یو آئی کے نائب صدر حسین سلطانیہ نے کہا کہ ’عوام کی جانب سے منتخب کی گئی حکومت کے ساتھ راجستھان گورنر کا رویہ ٹھیک نہیں ہے ہم بی جے پی کے رہنماؤں کو آئین کی کاپی دینے بی جے پی دفتر گئے تھے تاکہ دہلی کے سینئر رہنماؤں کو آئین سے واقف کروایا جاسکے۔
بی جے پی یوتھ ونگ کے راجیش گجر نے کہاکہ گورنر کی جانب سے اسمبلی سیشن نہ بلائے جانے کو لیکر اشوک گہلوت حکومت میں کھلبلی مچی ہوئی ہے۔ انہوں نے کانگریس کارکنوں کو مشورہ دیا کہ اگر وہ احتجاج کرنا چاہتے ہیں تو ہوٹل پیراماونٹ کے باہر یا گورنر کی رہائش گاہ کے باہر احتجاجی مظاہرہ کریں۔
