جالور: بیپرجوئے طوفان کے بعد پیدا ہونے والی سیلاب کی صورتحال کا جائزہ لینے کے لیے وزیر اعلی اشوک گہلوت جالور کے دو روزہ دورے پر ہیں۔ اس دوران انہوں نے بدھ کو عہدیداروں کے ساتھ میٹنگ کی۔ جس کے بعد انہوں نے جالور سرکٹ ہاؤس میں میڈیا سے گفتگو کرتے ہوئے بڑا بیان دیا۔ انہوں نے آر ایس ایس اور بی جے پی پر ریاست میں فسادات کرانے کا الزام لگایا۔ گہلوت نے مزید کہا کہ ہم راجستھان میں بی جے پی کے ہندوتوا ایجنڈے کو پنپنے نہیں دیں گے۔ راجستھان میں تمام مذاہب کا احترام کیا جاتا ہے۔
انہوں نے کہا کہ بی جے پی گائے کو لے کر سیاست کرتی ہے، جبکہ کانگریس ہمیشہ گائے کی خدمت میں آگے رہی ہے۔ سی ایم گہلوت نے کہا کہ بی جے پی میں ایسے بہت سے لوگ ہیں جو رام مندر کے لئے ہندو بن گئے ہیں، جب کہ وہ اصل میں ہندو نہیں ہیں۔ انہوں نے کہا کہ راجستھان نے تعلیم اور طب کے میدان میں بہت ترقی کی ہے۔ راجستھان ملک کی واحد ریاست ہے، جہاں امن اور عدم تشدد کا محکمہ قائم کیا گیا ہے۔ گہلوت نے کہا کہ آج ملک مشکل میں ہے، آئین کو ٹکڑے ٹکڑے کیا جا رہا ہے۔ جمہوریت خطرے میں ہے۔
انہوں نے کہا کہ آر ایس ایس اور بی جے پی کے لوگوں کو بھی تنقید برداشت کرنا سیکھنا چاہیے۔ تنقید زیور ہے۔ اپوزیشن نہیں ہوگی تو پارٹی کہاں ہوگی، تنقید سننے کے لیے حوصلہ ہونا چاہیے۔ انہوں نے کہا کہ ملکی مفاد کی بات کرتے ہو تو تنقیدی مضامین پڑھنا شروع کر دو، ہم پبلک پراپرٹی ہیں، عوام کے امانت دار ہیں۔ ہمیں سننا پڑےگا۔ ہم نے بجٹ عدم تشدد کو قائم کرنے، مہنگائی کم کرنے کے لیے پیش کیا ہے۔ اسی کے مطابق آگے بڑھ رہے ہیں۔
چیف منسٹر گہلوت نے جالور-سروہی کے ایم پی دیوجی پٹیل سے ملاقات نہیں کی، جو سرکٹ ہاؤس میں وزیر اعلیٰ سے ملنے آئے تھے۔ تقریباً تین گھنٹے انتظار کرنے کے بعد رکن پارلیمنٹ واپس لوٹ گئے۔ واپسی کے دوران ایم پی نے میڈیا کے سامنے حکومت کو ناکام قرار دیا۔ وزیر اعلیٰ کو جیسے ہی اس کا علم ہوا، انہوں نے رات کو خطاب کے پروگرام کے بعد رکن اسمبلی پٹیل کو فون کیا اور کہا کہ وہ کمر میں درد کی وجہ سے آرام کر رہے تھے۔ انہیں مزید انتظار کرنا چاہیے تھا۔ گہلوت نے میڈیا کے سامنے بھی یہ بات کہی۔ آدھی رات کو بھی ڈاکٹروں نے وزیر اعلیٰ کا بی پی غیر متوازن ہونے پر ان کا طبی معائنہ کیا تھا۔
وزیر اعلی اشوک گہلوت نے بپرجوئے طوفان سے ہونے والی تباہی سے نمٹنے کے لیے ضلع انتظامیہ کی تعریف کی۔ انہوں نے کہا کہ ضلع کلکٹر نشانت جین، اے ڈی ایم راجندر اگروال، ایس پی مونیکا سین سمیت سبھی افسران کے بہتر انتظام کی وجہ سے زیادہ نقصان ہونے سے بچ گیا۔ اس دوران ڈیزاسٹر منسٹر گووند میگھوال، سکھرام ویشنوئی، پکھراج پراشر، ڈاکٹر سمرجیت سنگھ، رتن دیواسی اور کئی عہدیدار اور کارکن موجود تھے۔
یہ بھی پڑھیں: Gehlot on Horse Trading سیاست میں پارٹی کی تبدیلی باعث تشویش، گہلوت
