خواجہ غریب نواز کو پیلے رنگ کے پھول بہت پسند تھے لہذا بسنت پنچمی کے موقع پر ان کے مزار شریف پر بسنت پیش کیے جانے کی روایت ہے۔
درگاہ کمیٹی کے ذرائع نے بتایا کہ پروگرام کے مطابق درگاہ کے شاہی قوال اسرار حسین درگاہ کے نظام گیٹ سے جلوس کی شکل میں بسنت پیش کرنے کے لیے سرسوں کے پیلے پھولوں کا گلدستہ لے کر بسنتی کلام پیش کرتے ہوئے مزار شریف پہنچیں گے۔
اس موقع پر درگاہ دیوان زین العابدین ، انجمن سیدزادگان اور شیخ زادگان کے صدر اور عہدیداران عقیدت مندوں کی موجودگی میں جوش و خروش کے ساتھ غریب نواز کی بارگاہ میں بسنت پیش کریں گے۔ نیز ملک میں قومی اتحاد اور بھائی چارے کو مستحکم کرنے کے لیے اجتماعی دعا کی جائے گی۔
