راجستھان میں گزشتہ کئی روز سے جاری سیاسی اتھل پتھل کے دوران آج ایک بار پھر سے کانگریس اراکین کی میٹنگ طلب کی گئی ہے جس میں ریاست کے نائب وزیراعلیٰ سچن پائلٹ کو بھی بُلایا گیا ہے۔
واضح رہے کہ گزشتہ کل ہونے والی میٹنگ کے لیے کانگریس نے تمام ارکان اسمبلی کے لیے وہپ جاری کیا تھا اس کے باوجود سچن پائلٹ نے میٹنگ میں شرکت نہیں کی تھی۔
اس دوران اس طرح کی خبریں بھی گشت کر رہی ہیں کہ پائلٹ نے آج بھی میٹنگ میں شریک ہونے سے انکار کر دیا ہے۔
گزشتہ روز میٹنگ کے بعد کانگریس کے قومی ترجمان رندیپ سرجے والا نے میڈیا سے کہا تھا کہ منگل کو (آج) بھی صبح 10 بجے اراکین اسمبلی کی میٹنگ طلب کی گئی ہے جس میں تمام ارکان اسمبلی کو بلایا گیا ہے اور خصوصاً سچن پائلٹ سمیت ان کے حامی اراکین سے بھی اس میٹنگ میں شریک ہونے کی اپیل کی گئی ہے۔
واضح رہے کہ گزشتہ روز ہونے والی میٹنگ کے لیے کانگریس کے سبھی اراکین اسمبلی کو وہپ جاری کئے جانے کے بعد بھی سچن پائلٹ اور ان کے ساتھیوں نے شرکت نہیں کی تھی جس سے کانگریس کے خیمے میں مزید ہلچل پیدا ہوگئی ہے اور لوگ وہپ کی خلاف ورزی کرنے پر سچن پائلٹ اور ان کے حامیوں کے خلاف کاروئی کا مطالبہ بھی کر رہے ہیں۔
