اجمیر: حج 2021 کے نئے رہنمایانہ ہدایات کے مطابق مقدس سفر کے لیے ایک فارم میں صرف 3 افراد کا نام ہی درج کیا جاسکتا ہے، فارم فیس 300 روپئے رکھی گئی ہے جبکہ مکمل سفر کےلیے 3 لاکھ 75 ہزار تا 5 لاکھ 25 ہزار روپئے خرچہ آسکتا ہے اور سفر 30 تا 35 روز تک محدود ہوگا۔
نئے قواعد کے مطابق ہر عازمین حج کو رہائش کے لیے 9 اسکوائر میٹر جگہ فراہم کی جائے گی جبکہ اس سال صرف 18 تا 65 برس کے افراد کو ہی حج کے سفر پر جانے کی اجازت دی جائے گی۔
ایسے میں عازمین حج کی بے چینی اور بے قراری میں اضافہ اس لیے بھی ہے کہ انہیں سفر حج سے 72 گھنٹے قبل کورونا ٹسٹ رپورٹ داخل کرنا لازمی قرار دیا گیا ہے۔
واضح رہے کہ حج 2021 کے لیے جاری کی گئی نئی رہنمایانہ ہدایات کے مطابق اس سال 18 برس سے کم اور 65 برس سے زیادہ عمر کے عازمین مقدس سفر پر نہیں جاسکتے جس کی وجہ سے ایسے افراد مایوس اور غمزدہ ہیں۔
