جالندھر: پنجاب کے جالندھر لوک سبھا ضمنی انتخاب کے لیے 10 مئی کو ہونے والی ووٹنگ کے نتائج آ گئے ہیں۔ عام آدمی پارٹی نے یہاں تاریخی جیت درج کی ہے۔ جالندھر لوک سبھا ضمنی انتخاب میں عام آدمی پارٹی کے امیدوار سشیل کمار رنکو نے کانگریس کو شکست دی ہے۔ سشیل رنکو کانگریس سے عام آدمی پارٹی میں شامل ہوئے تھے۔ ان کی جیت کے بعد پورے پنجاب میں عام آدمی پارٹی کے کارکنوں اور رہنماؤں میں خوشی کا ماحول ہے۔ عام آدمی پارٹی کے امیدوار سشیل کمار رنکو نے تقریبا 58 ہزار ووٹوں سے جیت درج کی۔ سی ایم بھگونت مان نے کہا کہ لوگوں نے ہمارے کاموں کو قبول کیا ہے۔
واضح رہے کہ طویل عرصے سے کانگریس میں رہنے والے سشیل رنکو نے 5 اپریل کو کانگریس سے عام آدمی پارٹی میں شمولیت اختیار کی تھی، پارٹی نے انہیں ضمنی انتخاب کے امیدوار کے طور پر اعلان کیا تھا۔ وہیں ووٹوں کی گنتی صبح آٹھ بجے کپورتھلا روڈ پر واقع ڈائریکٹر لینڈ ریکارڈ اینڈ اسپورٹس کالج کے احاطے میں ہو رہی تھی۔ گنتی مرکز کے اطراف سیکورٹی کے سخت انتظامات کئے گئے تھے۔ ای وی ایم کی گنتی شروع ہونے سے پہلے صبح 7.30 بجے پوسٹل بیلٹ کی گنتی کی گئی۔ اس سیٹ کے لیے 19 امیدوار میدان میں تھے لیکن اصل مقابلہ عآپ، کانگریس، ایس اے ڈی اور بی جے پی کے امیدواروں کے درمیان تھا۔
