سنگرور جیل میں جاری 'ہفتہ وصولی ریکٹ' کا انکشاف

موگا پولیس کے مطابق نودیپ نے اپنے مزید دو ساتھیوں، مگہر سنگھ اور بابھی سنگھ کے بارے میں بھی بتایا جنہوں نے مذکورہ تاجر کو خوفزدہ کرنے کے لئے ہوا میں فائرنگ کی تھی۔

پنجاب کی موگا پولیس نے سنگرور جیل سے چلائے جارہے ہفتہ وصولی کے ریکٹ کا پردہ فاش کیا ہے۔
موگا کے سینئر پولیس سپرنٹنڈنٹ ہرمنبیر سنگھ گل نے بتایا کہ ملزم کرپال سنگھ، جو سنگرور جیل میں بند تھا، کو پروڈکشن وارنٹ پر یہاں لایا گیا ہے۔ انہوں نے بتایا کہ کرپال سنگھ کے بارے میں پولیس کو پرسوں گرفتار کئے گئے نودیپ سنگھ سے معلومات ملی جس نے بگھاپرانا میں ایک تاجر کو گزشتہ ہفتہ فون کرکے ہفتہ مانگا تھا۔
موگا پولیس کے مطابق نودیپ نے اپنے مزید دو ساتھیوں، مگہر سنگھ اور بابھی سنگھ کے بارے میں بھی بتایا جنہوں نے مذکورہ تاجر کو خوفزدہ کرنے کے لئے ہوا میں فائرنگ کی تھی۔ نودیپ سنگھ کے مطابق اس ریکٹ کو سنگرور جیل میں بند گروہ باز کرپال سنگھ چلاتا تھا۔
پولیس نے بتایا کہ مگہر سنگھ اور بابھی سنگھ کو گرفتار کیا جانا ابھی باقی ہے۔