جموں و کشمیر کے ضلع پلوامہ کے قصبہ ترال کے ٹاؤن ہال میں آج یکت ویلفیر ٹرسٹ ترال کی جانب سے ایک تقریب کا اہتمام کیاگیا۔اس دوران کووڈ کی دوسری لہر میں محکمہ صحت اور میڈیا سے وابستہ کوڈ وارئیرس کی عزت افزائی کی گئی۔
اس موقع پر ٹرسٹ کے سربراہ فاروق ترالی نے ٹرسٹ کی سرگرمیوں کا خاکہ پیش کیا۔ اس موقع پر بی ایم او ترال ڈاکٹر بشیر احمد ملک اور ٹرسٹ کے دیگر ممبران بھی موجود تھے۔اس تقریب میں ای ٹی وی بھارت کے نمائندے شبیر بٹ کو بھی انعام سے نوازا گیا۔
بی ایم او ترال نے یکت ویلفیئر ٹرسٹ کی جانب سے کورونا وارئیرس کی عزت افزائی کرنے پر خوشی ظاہر کی اور عوام سے اپیل کی کہ وہ ویکسینیشن کے عمل میں شریک ہوں اور رہنما خطوط کی پاسداری کو یقینی بنایا جائے۔
ٹرسٹ کے سربراہ فاروق ترالی نے بتایا کہ کورونا کی دوسری لہر میں جہاں ہیلتھ ورکرز نے جان جوکھم میں ڈالکر گراں قدر خدمات انجام دیں۔ وہیں مقامی صحافیوں نے بھی صحیح صورتحال کی عکاسی کر کے ایک اہم کردار ادا کیا ہے جسکے لیے وہ مبارکبادی کے مستحق ہیں اور انکی عزت افزائی بھی کی گئی۔
