بندروں کا آبادی کی طرف رخ، کسان پریشان

کشمیر کے ترال علاقے میں ان دنوں بندروں نے دہشت مچا رکھی ہے۔ مقامی لوگوں نے محکمہ جنگلات سے اس کی شکایت کی ہے۔

جنوبی کشمیر کے ترال علاقے میں ان دنوں بندروں نے کئی افراد کو زخمی کر دیا ہے۔ شاہ آباد بالا میں رہائش پذیر آبادی نے آج محکمہ وائلڈ لائف کے خلاف ایک خاموش احتجاج کرتے ہوئے الزام عائد کیا کہ مذکورہ محکمے کے ملازمین موٹی تنخواہوں کو حاصل کرنے کے علاوہ کچھ نہیں کر رہے ہیں۔

مقامی لوگوں کے مطابق شاہ آباد بالا میں نزدیکی پہاڑی سے آئے بندروں نے مقامی لوگوں کا جینا حرام کر دیا ہے، جبکہ یہ بندر فصلوں اور سبزی کیاریوں کو نقصان پہنچا رہے ہیں، جس کی وجہ سے وہ خون کے آنسو رونے پر مجبور ہو گئے ہیں۔

مقامی لوگوں نے ای ٹی وی بھارت کے ساتھ بات کرتے ہوئے بتایا کہ اس بارے میں انھوں نے کئی بار حکام کو آگاہ بھی کیا لیکن بے سود۔ شاہ آباد کی جملہ آبادی نے انتظامیہ سے مطالبہ کیا ہے کہ جنگلی بندروں کو قابو میں کیا جائے۔