Tourism Picking Up In Tral: نارستان میں سیاحوں کی تعداد میں اضافہ

جموں وکشمیر کے ضلع پلوامہ کا نارستان گاوں جو کہ قدرتی خوبصورتی میں اپنی مثال آپ ہے، اس گاوں میں چودہ سو سال قبل بنے ایک شیو مندر کے کھنڈرات موجود ہیں جس سے اس بات کا اندازہ لگایا جا سکتا ہے کہ اس گاوں کی ایک تاریخی اہمیت بھی ہے۔سرکاری انتظامیہ کی جانب سے نارستان کو سیاحتی نقشے پر لانے کے اعلان کے ساتھ ہی یہاں سیاحوں کی تعداد میں اضافہ بھی دیکھا جا رہا ہے۔

ترال: جنوبی کشمیر کے ترال علاقے کو قدرت نے اپنے بے پناہ خوبصورتی سے نوازا ہے جہاں کی بلند قامت پہاڑیاں اور بہتے آبشار اس بات کی عکاسی کرتے ہیں کہ اگر فردوس برروے زمین است، ہمیں است و ہمیں است تو ہمیں است۔ تاہم جب ایل جی انتظامیہ نے ترال کے چار دیہات نارستان، شکارگاہ، پنر جاگیر اور آری پل کو سیاحتی گاوں قرار دینے سے یہاں کے عوام میں بہت ہی مسرت ہوئی اور لوگوں کو یقین ہوا کہ اب انکے حالات بدل جائیں گے۔

نارستان گاوں جو کہ قدرتی خوبصورتی میں اپنی مثال آپ ہے، اس گاوں میں چودہ سو سال قبل بنے ایک شیو مندر کے کھنڈرات موجود ہیں جس سے اس بات کا اندازہ لگایا جا سکتا ہے کہ اس گاوں کی ایک تاریخی اہمیت بھی ہے۔سرکاری انتظامیہ کی جانب سے نارستان کو سیاحتی نقشے پر لانے کے اعلان کے ساتھ ہی یہاں سیاحوں کی تعداد میں اضافہ بھی دیکھا جا رہا ہے، جسکی وجہ سے مقامی لوگوں کے چہرے پر مسکان بھی ہے اور اب اس گاوں میں کچھ ریسٹورنٹ بھی کھل گئے ہیں، جہاں سیر پر آنے والے لوگ من پسند کھانا کھا رہے ہیں تاہم یہاں کے لوگوں کا کہنا ہے کہ گاوں میں سیاحت کے بنیادی ڈھانچے کی کمی اور اس حوالے سے معقول اقدامات کا فقدان سیاحوں کے لیے پریشانی کا باعث بن رہا ہے۔

مقامی لوگوں نے ای ٹی وی بھارت کو بتایا کہ یہاں تو وادی کے قرب وجوار سے لوگ سیر کو آرہے ہیں تاہم یہاں سیاحوں کو بیٹھنے کے لیے پارک نہ ہونے سے انھیں مشکلات کا سامنا کرنا پڑرہا ہے، مقامی لوگوں کے مطابق نہ صرف نارستان بلکہ نزدیک صحت افزا مقام ناگہ بیرن کو بھی سیاحتی نقشے پر لانے کی ضرورت ہے کیونکہ ایسا کرنے سے یہاں کی اقتصادیات کو رفتار دی جا سکتی ہے۔ ڈی ڈی سی ممبر آری پل منظور گنائی نے نمائندے کو فون پر بتایا کہ آری پل اور، نارستان میں جلد ہی ٹورازم کے ڈھانچے کو مضبوط بنانے کے لیے کام شروع ہوگا جسکی وجہ سے نہ صرف یہاں کے لوگوں کا روزگار بڑھے گا، بلکہ ترال علاقہ ترقی یافتہ ہوگا.